O loo faatāua i Samoa le aso faapitoa mo le aufaigaluega a le malo, i le autu mo lenei tausaga o le “Talofa ma le laufofoga fiafia” ma o se aso o le malo o loo tuuuina atu ai le tuualalo i le aufaigaluega a le malo ina ia maua le agaga o le va fealoaloai aemaise o le laumata fiafia auā le tautuaina o le atunuu.
E faapena se tautua o lea ua faaauauina pea i totonu o le ofisa o le Konesula a le malo o Samoa i totonu o Aukilani o le taumafai lea e momoli atu le agaga o le malo o loo iai, ia maua pea le laumata fiafia auā le tautuina o Samoa.
Saunoa le afioga i le Konesula o Samoa ia Afemata Palusalue Faapo II, o le laumata fiafia o le tali lea i se tagata o loo sulu mai i se manaoga ma fia maua se fesoasoani i le ofisa.
O le faatāuaina e le malo o lea tulaga auā e iai nisi o le atunuu e sulu atu i le fia maua o se fesoasoani ae lē o mafai ona tali le manaoga, ae ua lava le laufofoga fiafia o le aufaigaluega e faanofo filemu ai le loto o le tagata mafatia.
Ua tuualalo le afioga i le Konesula o Samoa i Aukilani i le aufaigaluega ma le pulega faapea i latou o loo faauluulu iai matagaluega a le malo ina ia tautuana le tali lelei o le mamalu o le atunu o loo autovaa atu mo se fesoasoani.
O le tele o galuega ua iai tulafono ua limataitaiina ai o latou tiute fai, ae o le va fealoaloai o le mea sili lea ona tāua i totonu o le atunuu o Samoa.
Lea foi ua aumai le saunoaga a le Konesula ia Afeamata Faapo II i lana aufaigaluega mo le mamalu o le atunuu, o ai lava e savalia lona ofisa mo se fesoasoani o loo maua pea lona avanoa e faatalatalanoa ai se mataupu.
