Ua toe lua vaiaso o le masina amata o lenei tausaga ona mae’a lea ae sauni matua i le toe a’e o a’oga a le fanau e mana’omia tele ai le seleni mo faatauga ofu a’oga o pili ma isi tapenaga masani, peitai o lea o loo mata’itū e tagata faigaluega pe maua se dividend poo se faamanuiaga masani mai le NPF o loo totogi iai a latou saofaga.
O le masina amata o tausaga uma i le toe a’e o galuega e masani ona faailoa ai lea pasene o lea faamanuiaga peitai o lenei tausaga ua amatalia o loo nofo pogisa le aufaisaofaga pe maua lea faamanuiaga pe leai.
Ua faailoa e le Ofisa Sili o le pulega o le faalapotopotoga o le faaputugatupe o le lumana’i manuia o tagata le NPF i se lipoti a le Samoa Observer, e le’i faia se faai’uga a le minisita ma le komiti faafoe o le faalapotopotoga i se pasene o le tufatufaga o le dividend o lenei tausaga.
O le tausaga faaletupe 2023 i le 2024 na faamatuu ai e le NPF lana faamanuiaga mo le aufaisaofaga e 24 miliona 76 afe ma le 668 tala.
