Ua i luma nei o le tamaitai Faamasino o le Faamasinoga Maualuga le afioga Niava Mata Keli Tuatagaloa, folasaga poo submissions a le loia a leoleo ma le loia a Talalelei Pauga, e faasino i le talosaga a lē o loo molia ina ia faasee ese le Faamasino le afioga Niava mai le tauaveina o suesuega o moliaga o Talalelei Pauga, ona o atugaluga e faapea e pito tasi le silasila a le faamasino i le suesueina o moliaga o le taupulepule e faaoo le maliu i le susuga Tuilaepa L Sailele Malielegaoi sa avea ma Palemia o le atunuu.
O le faaiuga foi o lea talosaga o le a aumai ai se faaiuga i le fesiligia e le Faamasino o le tulai o le tamaitai loia o Josephine Fuimaono Sapolu mo Talalelei Pauga ae o se tasi lea o tuutuuga o le tatala i tua o lē ua molia ina ua talia lana talosaga e tatala i tua e faatali ai le suesueina o ona moliaga, o le nofo lea i le aiga o le loia ua tulai nei mo ia.
Mo le silafia o le loia sa tauaveina muamua moliaga o Pauga, ua galue nei o le faauluuluga o le ofisa o le komisi mo le toe fuataina o tulafono a Samoa.
Na faailoa e le Faamasino le afioga Niava ina ua toe valaau le mataupu lenei i le Aso Tofi o le vaiaso nei, o lana faaiuga tusitusia o le a aumai ai tali o le talosaga o lona faasee ese, ma le suia o le loia pe lē o iai se vaega o le tulafono e aafia ai ona o se conflict of interest.
