O Amerika Samoa ua tufa atu iai le ‘oa o le galuega ua tuufaatasia i le Tusi Faatonu’upu o le Gagana Samoa, e pei ona malaga le ta’ita’i o le Malo le afioga i le Palemia e faasoa atu lea galuega tāua e pei ona sa faalauiloa i lo tatou atunuu talu ai nei.
O se galuega ua faafetaia ai e le ta’ita’i o le Faigamalo a Tutuila ma Manu’a le afioga i le Kovana Sili, le Palemia o le Malo Tutoatasi ona o le galuega ua tino mai, o le a faaaogā e ona tagata auā o se tasi lea o pine o le Atoa o Samoa.
O le finagalo foi o le tamaitai Palemia i le sauniga na faia i le Kolisi Tuufaatasi o Amerika Samoa na lipotia e le faletelevise o le KVZKTV na ia faailoa ai o se galuega tāua tele ina ia faatumau ai pea le tatou gagana.
O Samoa foi i Sasae ma Sisifo na faaalia e le Palemia o le uso tuofe e lē o se uso tau feagai.
O ni vaega o saunoaga a ta’ita’i o faigamalo a Samoa e lua i se lipoti a le faletelevise o le KVZKTV, le afioga i le Kovana Sili o Amerika Samoa le afioga Lemanu Peleti Sialega Mauga, ma le ta’ita’i o le tatou Malo Tutoatasi o Samoa le afioga i le tamaitai Palemia, Fiame Dr Naomi Mataafa, i le faalauiloaina o le Tusi Faatonu’upu o le Gagana Samoa i laufanua o le teritori.
