Na toe valaau i le taeao ananafi le mataupu a se alii leoleo i amioga matagā, o loo tuuaia ai faasaga i se tasi o tamaitai leoleo i le lua vaiaso talu ai.
Ua mae’a ona faamautu uma moliaga a leoleo, ma natalosagaina ai e le tamaitai loia a le ofisa o le Loia Sili le faamasinoga ina ia faasee atu le mataupu i le faamasinoga faaitumalo e iloilo ai.
E lua moliaga o le faia o uiga matagā i se tamaitai leoleo ua tuuaia ai lea alii leoleo satini.
O le faasalaga maualuga a le faamasinoga i lea moliaga e 7 tausaga e falepuipui ai, ma e patino tonu lava i le faamasinoga faaitumalo.
E lei tuuina atu se tali a le alii leoleo i moliaga ua faia e faasaga ia te ia, ae o le aso 12 o le masina nei o le a tulai ai i luma o le faamasinoga faaitumalo.
O le vaiaso na tea nei na faaleo ai e le Komesina o leoleo o Auapaau Logoitino Filipo lona faanoanoa i le aliae mai pea o soligatulafono e aafia ai leoleo, peitai na faailoa manino e le komesina e leai lava se tasi e i luga atu o le tulafono.
Ma e tatau lava ona tali i tuuaiga o loo tuuaia ai.
Ua silia ma le 20 tausaga talu ona galue lē o loo tuuaia i le Matagaluega.
