O le taumafaiga a le loia sa tulai mo Poasa Leaupepe o se faifeau tausi matagaluega o le Ekalesia Metotisi e finauina le talosaga e faapafala se faasalaga e aunoa ma le faamaonia o se moliaga solitulafono, e lei talia e le faamasinoga.
O le fautuaga foi a le itu a leoleo ina ia faamaonia le moliaga o le faaoolima o le faifeau ae faapafala se faasalaga, e lei talia foi e le tamaitai faamasino le afioga Alalatoa Rosella Viane Papalii, ae ua ia faamaonia le moliaga o le faifeau ma nofo vaavaaia mo le 6 masina, ma tuu iai le 60 itula e galue fua ai e leai se totogi mo le lelei o tagata lautele.
Ua lē talia e le faamasino ia talosaga ona o le mae’a ona ia iloilo o molimau sa toe finauina ai ni vaega o tolaulauga a leoleo i le solitulafono na taunuu ai i le faaiuga, o le gaioiga na faia e lē ua molia i le tamaititi o lona faaoolima lea iai, i le tatu’i o ona itu ma po le patua, e tugā pe a tuu i le maualuga o le fua o le solitulafono o le faaoolima.
Sa muamua tulai Poasa Leaupepe 68 tausaga o le soifua, i le faamasinoga maualuga i le solitulafono lenei ma faaui ai i tua e leoleo moliaga o le fasioti tagata paivalea, ma le faaoomanu’a tugā, ae totoe ai le moliaga o le faaoolima na suesueina i le faamasinoga faaitumalo.
O le tamaititi na aafia na fano lona soifua i le mae’a o le faaoolima, peitai o le lipoti a le fomai ua faaalia ai na mafua ona maliu le tamaititi o āuga o le gasegase o le leukemia poo le toto ua aafia i le kanesa.
O Fepuari o le tausaga e 2020 na maliu ai le tamaititi, ae o le solitulafono na tupu a o galue faafaifeau lē ua molia i le nuu o Safotu i Savaii.
