O le taeao nei na faalia ai e le alii tusitala ia Michael Field ua loa lana tuatua ia Samoa ma le Pasefika i luga o le Facebook a le Pacific Newsroom le osofaia o ia i se saunoaga lē faavaea a le Alii Palemia o le Malo Tausi Tuilaepa Lupesoliai Sailele Malielegaoi ona o se ripoti faasaga i le tapunia ai o le Social Media i Samoa.
E pei ona silafia o le vaiaso na tea nei lea na faasalalau ai e Michael Field ripoti i luga o le Pacific Newsroom e faapea o le a agai le malo tausi e tapunia uma social media ao loma ai se fuafuaga mo se faigapalota fou. Na taua i se feau tusitusia e mafua lenei fuafuaga ina ia taofia le feaveai o faamatalaga ma tala tau faamata’u faasaga i le Palemia ma le Ao o le Malo.
Ae peitia o le faaiuga o le vaiaso na tea nei lea na ripotia ai e le Samoa Observer se latou faatalatalanoaga ma le taitai o le Vaega faaupufai e Puipuia aiā Tatau a tagata lautele le susuga Tuilaepa e faapea “soo se tapu lava mo le social media e mo se taimi lē tumau”.
Mulimuli ane i nai itula o le afiafi o le Aso Toonai ae faasalalau loa e le facebook a le vaega faaupufai a le HRPP e faapea e leai se fuafuaga a le Malo tausi e tapunia ai le social media. O lea faasalalauga e le’i o gatasi ma le saunoaga na faia muamua e Tuilaepa.
Taua e Michael Field e le gata o le osofaia o ia i saunoaga a Tuilapea ae faapea foi le Pacific Newsroom, o lona talitonuga o le fuafuaga o le tapunia ai o le social media ua toe vave aveese ona ua maua e ofisa faasalalau.
