O se tulaga faapopoleina ua iai le Matagaluega o Leoleo ona o tuuaiga o le aafia ai o leoleo i fualaau faasāina.
Na faailoa e le tamaitai Sui Komesina ia Papalii Monalisa Tia’i Keti o le itu e popole ai ona e lē faatoa tulai mai lea o lenei faafitauli ma tuuaia ai alii ma tamaitai leoleo, o ē na tauto e tausi ma faamalosia le tulafono mo le saogalemu o Samoa.
O le Aso Lulu o le vaiaso na mavae nei na amata faamalolo mai ai leoleo e toafā mai le Matagaluega ona o loo masalomia lo latou aafiaga i fualaau faasāina, a o faia ai suesuega e le ofisa o le Professional Standard Unit (PSU).
Ua faaalia foi e Papalii ua silasila nei le Matagaluega i le ono faia o ni faiga faavae e mafai ai ona faia suesuega o alii ma tamaitai leoleo pe o aafia i fualaau faasāina.
“E lē o mafai ona faia lea tulaga i le taimi nei ona e lē o iai ni faiga faavae ma faatulafonoina”.
E lē o iloa i le taimi nei pe o le ā le umi o le faamalologa lē tumau, ae ua faailoa e Papalii o lea tulaga ua faia e faailoa atu ai ia i latou ua faamalolo ma leoleo uma o le Matagaluega, e lē mafai ona talia e le Pulega nei amioga ma e lē māmā i le silasila a le Komesina ma le Pulega le tulaga ua tulai mai.
O le tausaga 2022 e silia i le 20 alii ma tamaitai leoleo na faamalolo lē tumau foi ona o tuuaiga o lo latou aafiaga i fualaau faasāina, na iu ina faamaonia ai moliaga o leoleo e toatolu ae faamavae ai isi mai le Matagaluega.
