Ua faapaleina nei le tamaitai talavou lalelei, Moemoana Safaato’a Schwenke, e avea ma Tausala poo le Miss Samoa 2023-2024.
E ono faailoga na manumaloina e Moemoana, ma taaofai atoa ai loa i lona manumalo aoao i le pale mo le Tausala o Samoa
Sa mataina le matagofie ma lavatapena o tamaitai uma e toasefulu na tauvaina le pale o le Tausala o Samoa poo le Miss Samoa 2023-2024, ae pei lava o upu a le atunuu, ‘e lē mua uma ni vaa’ ma e tatau lava ona iai se tamaitai e tu matila ese mai ana tapenaga i le silasila a alii ma tamaitai faamasino, o lea na tulai mai ai le tamaitai talavou, o lē sa avea ma sui o tagata Samoa mai le Setete o Niu Sa Uelese poo New South Wales, le tamaitai lalelei o Moemoana Safaato’a Schwenke, ma ua faapaleina ai nei o le Lalelei poo le Tausala o Samoa 2023-2024.
O le a sauni atu nei la Moemoana e fai ma sui o Samoa i le tauvaina o le pale o le Tausala o Motu o le Pasefika poo le Miss Pacific Islands, lea o loo tauaveina nei e le Tausala mai Papua New Guinea, Josie Nicholas.
O Moemoana na fanau i Samoa ae o lona olaga atoa na soifua ane ai i Niu Sila ma Ausetalia, i ona mātua o Fredrick Schwenke ma Maryjane McKibbin-Schwenke.
O le tina o Moemoana, o Maryjane McKibbin, sa manumalo foi i le pale o le Miss Samoa ma le Miss South Pacific i le 1997-1998.
O se tausaga ese lenei ua toe vaaia le toatele o tamaitai ua naunau e fia tauva i lenei tauvaga, lea e tele ina taualuga i ai vaega uma o le polokalame o le Teuila i tausaga taitasi.
E toasefulu tamaitai talavou na tauva, e toatasi na malaga mai Ausetalia, mai le setete o Niu Sa Uelese, lea ua faapaleina nei, e toatasi le tamaitai mai Aotearoa i Niu Sila ae na tauva mai le aai o Kalaiesetete, le tamaitai o Cherish Faamanu Manaia, ae o isi uma tamaitai e toavalu sa lagolagoina lava e kamupani eseese i totonu o Samoa.
O se isi foi itu na tulaga ese ai le tauvaga o lenei tausaga, ona sa tauva ai se tamaitai e logonoa, le tamaitai lalelei o Miracle Afelē, ma e maeu foi le mataina o lana tapenaga i vaega uma, ma na matuā faamaonia ai, e mafai e soo se tamaitai ona tauva i nei tauvaga, e tusa lava pe iai se vaega o lona soifua o loo iai se manaoga tumau.
I le tele o vaega na faia iai le tauvaga, e leai se tamaitai tauvā na ama mai ana tapenaga, o laei taele, o puletasi, o laei faaleaganuu, o taleni, ae faatini i le taliga fesili.
Faatulagana o Faailoga:
Miss Personality: Contestant No.6 – Vaelei Von Dinklage
Miss National Tourism: Contestant No.10 – Karameli Serah Purcell
Miss Photogenic: Contestant No.1 – Tashana Lee Opelu
Miss Internet: Contestant No.9 – Moemoana Safaato’a Schwenke
Best Siva Samoa: Contestant No.9 – Moemoana Safaato’a Schwenke
Best Sarong: Contestant No.9 – Moemoana Safaato’a Schwenke
Best Puletasi: Contestant No.9 – Moemoana Safaato’a Schwenke
Best Traditionally Inspired Attire: Contestant No.8 – Nicolina June Ah Kuoi
Best Talent: Contestant No.9 – Moemoana Safaato’a Schwenke
Best Interview: Contestant No.9 – Moemoana Safaato’a Schwenke
Aotelega o Tulaga:
Fourth Runner Up: Contestant Nu.4 – Miracle Afelē
Third Runner Up: Contestant Nu.2 – Moelotoulalemamae Vitolina Willimina Tuilaepa Tiatia
Second Runner Up: Contestant Nu.10 – Karameli Serah Purcell
First Runner Up: Contestant Nu.8 – Nicolina June Ah Kuoi
WINNER: Contestant Nu.9 – Moemoana Safaato’a Schwenke
