Ua mae’a le tauvaga o le sailia o se Tausala a le atunuu le Miss Samoa mo lenei tausaga 2024 ma faasolo atu i le 2025, ma ua tula’i mai ai nei le filifiliga a faamasino, o le tamaitai lalelei o Litara Loma Leilani Ieremia-Allan, o ia lea ua tauaveina nei le pale o le Tausala o Samoa.
Sa mata’ina ma lava tapena tamaitai tauva uma i le faatinoga o vaega eseese na faia iai le tauvaga, peitai sa tulaga ese mai le tamaitai o Litara i le tele o vaega na aga’i iai le tauvaga ma ia manumaloina ai le 6 o vaega o faailoga autū, ma le 2 mai faailoga faapitoa.
O le afiafi o le Aso Toonai, aso 7 o Setema lea na taualuga i ai vaiaso e 2 sa faagasolo ai lenei tausinioga, ma faauma iai isi vaega autū o le tauvaga, e pei o le Siva Samoa, Taleni, Laei Faaleaganuu, ma le Stage Interview poo le Faatalanoaga i luga o le Fola i lea afiafi.
O le Aso Faraile na faatautaia ai le ulua’i faatalanoaga le Pre Pageant Interview, ma o togi na maua e tamaitai tauva taitoatasi ma lea mua’i faatalanoaga sa faaopoopo i togi na latou maua ia latou faatalanoaga i le po faai’u.
E ese mai vaega uma na faitaulia ai togi, ae o vaiaso e lua a o faagasolo uma a latou polokalame sa auai, sa mata’itūina uma ai lava aga ma uiga faaalia o nei tamaitai ta’ito’atasi ina ia faamautinoa e atagia atoatoa mai i soo sa latou aga le ituaiga moni o tamaitai Samoa na te faatāua ma tauaveina le autū o lenei tauvaga, “Alofa i lau Samoa Matalasi”.
O le afiafi foi lea na faamavae aloa’ia mai ai i le atunuu le tamaitai sa tauaveina mai le pale o Miss Samoa mai le tausaga talu ai, le lalelei o Fuatino Moemoana Safaato’a Schwenke, o se Miss Samoa na matuā maualuga lona siitia o le tulaga o Samoa i vaipanoa uma sa asiasi atu ma le faatinoga o ona tiute o se tamaitai sa tauaveina le igoa o Samoa.
Ua totoe ai nei na o le pale o le Tausala o Atumotu o le Pasefika o loo tauaveina pea e Moemoana seia oo ina faapaleina le Miss Pacific Islands o le a sosoo mai.
O le faasologa i lalo o faailoga uma ma i latou na manumaloina.
FAAILOGA FAAPITOA:
Miss Personality: Miss Hidden Threader.
Miss Tourism: Miss Tausala Amerika.
Miss Photogenic: Miss Impact Services
Miss Internet: Miss Impact Services.
FAAILOGA AUTŪ:
Best Sarong: Miss Impact Services.
Best Creative Coconut: Miss Impact Services.
Best Puletasi: Miss Samoa Victoria.
Best Siva Samoa: Miss Impact Services.
Best Talent: Miss Impact Services.
Best Traditonally inspired attire: Miss Impact Services.
Best Stage Interview: Miss Impact Services.
4th runner up – Miss Samoa Victoria.
3rd Runner up – Miss Hidden Threader.
2nd Runner up – Miss Lavashe Couture.
1st Runner up – Miss Pacific Climate Warriors.
Miss Samoa 2024 – Miss Impact Services.
