I le ripoti lata mai a le Matagaluega o le Soifua Maloloina ua fa’amaonia le fa’aopoopo ai o se tasi ua maliu ona o āuga o le Koviti-19 i totonu o le 48 itula ma ua si’itia ai le aofa’i oi latou ua māliliu i le to’a 10 talu ona sao i tua le fa’ama’i i le Aso 17 Mati 2022 
  
O lē ua fa’amauina ua māliu, o se tama e 70 tausaga le matua. O le amanaia ma le fa’aaloalogia o ‘āiga o e ua māliliu, o le a lē i ai ai nisi fa’amatalaga fa’aopoopo e tu’uina atu. 
  
Ua ripotia foi e le Matagaluega le fa’aopoopo ai oi latou fou e to’a 701 ua pesia i le siama o le Koviti-19. I lea fainumera e to’a 17 i latou o lo’o taofia i le Maota Gasegase i Moto’otua ma le to’a 2 o lo’o i le potu tigāina talu mai le 48 itula i le itula e 2:00 i le aoauli o le Aso 10 Aperila 2022 se’ia o’o mai le 2:00 i le aoauli o le Aso 12 Aperila 2022. 
  
Ua fautuaina ai le mamalu o le atunuu ina ia utagia ma usitaia fautuaga faalesoifua maloloina o loo tuuina atu e le Matagaluega ma le Komiti o Faalavelave Faafuasei mo le saga puipuia o le atunuu atoa mai le pepesi o le faama’i.