Ua toe faaopoopo aso mo sailiiliga a le Komiti filifilia o Tulaga Aloaia ma Amio Taualoa a le Palemene i le faitioga na faato’ai i le Fofoga Fetalai e le sui Faipule o Gaga’emauga Numera muamua le afioga i le Sui Palemia faasaga i le Taitai o le Itu Agai ma le Sui Faipule o Faleata Numera 3.
O le tauaofiaga faaauau a le Fono Aoao Faitulafono i le Aso Lua o le vaiaso nei na faatulaga e lipoti atu ai i le Palemene le Komiti, peitai o le lafo faatū a le taitaifono o le Komiti le afioga i le Minisita o Soifua Maloloina e faaopoopo se taimi mo a latou sailiiliga ma lipoti atu i le isi tauaofiaga ua faatulaga mo le Aso Lua a sau na pasia e le Palemene.
E ui ua toe taatia le mataupu lenei i le isi aso fono e sosoo ai, peitai na folasia i le maota fono se finagalo o le Fofoga Fetalai ma faaalia lona faanoanoa i le lē auai o se tasi o sui i le fono ae o lea sui o loo aafia i le sailiiliga a le komiti. E pei ona silafia o le sui faipule o le itumalo faapalota o Lepa le taitai o le Itu Agai na toesea ma le atunuu i le vaiaso na te’a nei ona o se fono a le pulega o le lakapi a le lalolagi sa faia i Dublin i lona tulaga o le taitaifono o le pulega o le Lakapi Samoa.
