E 5 tausaga o si teineitiiti o Kiara lea na ave e le faia’oga ma tuu i fafo o le potu a’oga mo sona a’oa’iga (time out) ona o le lē usita’i ane i le taimi na faasaofafa’i uma ai tamaiti i lalo mo se latou meafai a le vasega (mat time).
Na faamatala le tamā o le teineitiiti i le Herald, o lea faato’ā tolu vaiaso talu ona a’e łona afafine i le a’oga, ae tupu ai lenei faafitauli i le Aso Gafua na te’a nei, mai le va o le 11.30am ma le 12pm.
Na ta’ua e le tamā ia Alvin Raju, ina ua ave lona afafine e le faia’oga ma tuu i fafo, o le manatu o le teineitiiti ua lē toe mana’o le faia’oga ia te ia, lea loa na amata ai ona alu ese i fafo mai le lotoā ma savali loa i lona aiga.
Ta’ua e mātua o le teineitiiti, e lua auala na kolosi e le teineitiiti ma savali atu ai i autafa o magāala pisi a o aga’i atu i lo latou fale.
Na faamatala e le tinā o le teineitiiti, Jotika Swamy i le Herald, pe tusa o le 12.20pm na aga’i atu lana taavale ae ona iloa atu lana tama o loo savavali atu ma se tamaloa e latou te lē iloa, ma o loo aga’i atu i le auala savali i Robert Ross Place.
Na fesiligia e le tinā le tamaloa na o atu ma lana tama ma iloa ai o se alii avetaavale Uber, o lea na ia vaaia le teineitiiti i fafo ane o le McDonald i Clendon ma o lea sa ia taumafai e momoli atu i lona aiga.
O inā na ave ai e le fafine lana tama ma toe ave atu i le a’oga, ma na ta’ua e le tinā, na faate’ia le a’oga i le o atu ma lana tama.
Ta’ua e le tinā, ana ia lē mauaina lana tama o savali atu i le latou fale, semanū e latou te lē iloa o lea ua lē iai le teineitiiti i le a’oga, le Finlayson Park School i Manurewa.
Na ta’ua e le pulea’oga a le Finlayson Park School, Sumithra Naidoo i le Herald, e matuā faatāua e le a’oga le saogalemu o le fanau a’oga, o le mafua’aga lea na faia ai e le a’oga se pa mo se taimi lē tumau e tali atu ai i le faalavelave na tula’i mai.
Ua oo foi lenei mataupu i le Matāgaluega o A’oga ona o lea ua aafia ai le aiga.
Ta’ua e le tamā o le teineitiiti i le Herald, o loo taumafai pea e faapelepele ma tau faate’a ese le mea na tupu i le mafaufau o si ona afafine, ma o loo ia faatuatuaina pea le a’oga pau le mea ua mana’o ia sui se faia’oga e a’oga ai lona afafine.
O le fautuaga a lenei tamā mo isi mātua, ia tautuanā fanau, ia aua ne’i tuua le fesilisili pea i fanau poo sologa lelei mea i le a’oga; ma ia faamautinoa o loo saogalemu i latou i taimi uma.
