E silia i le to’a 30 alii taaalo lakapi lea ua faasāina ona toe taaalo lakapi i soo se taamilosaga i le atunuu masalomia lo latou faaoolima i le alii laufalī (referee) ia Posi Isamaeli.
I le silia ma le to’a 30 ua faasāina e to’a 25 mai le kalapu Lakapi a Levi Saleimoa lea ua faamuta ona toe taaalo mo le 5 tausaga ma ua taua e matai o lea afioaga ua le toe faia ma se au a Levī Saleimoa ona o lea faalavelave.
O igoa o i latou na masalomia le faaoolima ia Posi Isamaeli na faalauiloa i se lisi mai le Lakapi Samoa Events ua matauina ai e to’a lima alii taaalo mai Lufilufi, Vaigaga ma Levi Saleimoa ua faamuta ona toe taaalo lakapi i le olaga atoa (banned for life).
Na tulai mai lenei faalavelave i le masina o Aperila i le tausaga nei ina ua taaalo le au a Levi Saleimoa ma le au a Tufulele i le taamilosaga lakapi a Tuamasaga. O ni ata na pueina na iloa ai le tamoe o le alii laufalī i le maota o le faifeau mo se fesoasoani ao tau fai tuli atu o Ia e le au taaalo ma nisi o le au matamata.
O le faailoa ai o igoa o i latou nei ona o loo loma le taamilosaga taitoafitu a le Vodafone i Iva i Savaii o le a toatele ai i latou e auai atu e maimoa lenei taamilsoaga taua ina Ia mautinoa e le auai pe toe tulai mai nei faiga le alofa.
Taua e Seiuli Salesa Seiuli o le faatonu o taamilosaga lakapi na talosagaina le fesoasoani a peresetene o kalapu na aafia ina ia faaoo atu igoa o i latou na auai i le taumafai e faaoolima i le laufalī.
