Ua faamuta nei le toe avea ma ta’ita’i ma sui auai o le faafaletui o faipule o le vaega faaupufai o le Faatuatua i le Atua Samoa ua Tasi, le sui faipule o le itumalo o Lotofaga, le afioga i le tamaitai Palemia le afioga Fiame Naomi Mataafa.
O le faai’uga lea na taunuu iai le fono a le to’a 20 o faipule o le faafaletui i le afiafi ananafi, e pei ona faailoa e le ta’ita’ifono le sui faipule o Gagaifomauga 3 le susuga Laauli Leuatea Polataivao Fosi Schmidt i se faasalalauga i le po anapo.
O le fonotaga foi lea na autasi ai le numela fulisia o faipule o le faafaletui e faamuta le toe avea ma sui auai o le pati faaupufai o minisita e to’alima e aofia ai le Sui Palemia le afioga Tuala Tevaga Iosefo Ponifasio, o le tofa OIo Afoa Fiti Vaai, o le tofa Leatinuu Wayne Sooialo, tofa Faualo Harry Schuster, ma le afioga Toeolesulusulu Cedric Schuster.
Faaalia e le ta’ita’ifono i lana faasalalauga sa ave le logo i ia sui o le faafaletui i le fonotaga ae e le’i auai atu.
Le ta’ita’ifono o le vaega faaupufai o le faatuatua i le Atua Samoa ua Tasi susuga Laauli Leuatea Polataivao Fosi Schmidt.
