Ua faamuta le toe avea ma Malu o le Malo poo se leoleo le susuga Li’o Faataumalama Auava ma le tamaitai o Henifa Bryce.
O le faaiuga lea ua taunuu iai iloiloga o le faamasinoga faaleoleo le Police Tribunal sa suesue ai moliaga faasaga ia Li’o sa umia le tulaga faaleoleo o le leoleo asiasi poo se Police Inspector, ma Henifa sa umia le tulaga o se leoleo taai lua poo le Police Corporal.
O le Aso Lulu o le vaiaso nei na fofogaina ai le faaiuga a le faamasinoga faaleoleo na faamaonia ai moliaga e tolu mo lē sa avea ma leoleo asiasi ae tasi le moliaga na faamaonia o lē sa avea ma leoleo taai lua.
O ia moliaga na faamaonia e fesootai i le suesuega na faia e i laua ua faamuta le toe avea ma Malu o le Malo, agai lea i le mafuaaga o le maliu o Tu’uau Faasavalu i se faalavelave tau taavale i Vaitele uta i le savalia ai nei le tolu tausaga.
O se suesuega na faia e aunoa ma se faatanaga a le Komesina o leoleo.
E fitu aso mai le aso na lau ai le faai’uga ua avanoa ai i la’ua ua faia iai le togisala e apili ai, pe leai le faaiuga a le faamasinoga faaleoleo.
Ua faailoa e Lio Faataumalama ina ua fesootai iai i le maea o le lauina o le faaiuga, ua tapena e ana loia se talosaga e toe suesue ai le faaiuga poo se apili, o le a faulu i le Faamasinoga Maualuga a le atunuu.
