Search

Faamuta le lauga a le sui taitai o le Itu Agai

O le talanoaina o le lipoti faapalemene mo le matagaluega o faamasinoga na amata ai ona tu tu aai le Fofoga Fetalai i le faamalosia o aiaiga o tulafono tumau, i le faamuta o le saunoaga a le sui taitai o le Itu Agai le tofa Lauofo Fonotoe Pierre Meredith.

O le faaiuga muamua lea ina ua toe faaauau fonotaga a le fono aoao faitulafono i le Aso Lua o le vaiaso nei.

O le mafuaaga o le faaiuga na faamuta ai le lauga a le sui taitai o le Itu Agai, ona o ia o se sui o le komiti faapalemene e ana le lipoti, ae e lē faatagaina ona toe saunoa se sui o se komiti i le latou lipoti pe a oo ina tuuina atu i le Palemene mo le talanoaina.

O le tofa Lauofo le isi sui o lea komiti e lei saini i le latou lipoti, ae sa faailoa e le sui taitai o le Itu Agai na mafua ona lē saini i le lipoti ona sa toesea i malaga faalemalo i atunuu i fafo.

A o faaauau ona talanoaina le lipoti a le komiti faapalemene sa lauliliuina le lipoti faaletausaga a le matagaluega o faamasinoga, na faamuta foi e le Fofoga Fetalai se vaega o le saunoaga a le taitai o le Itu Agai susuga Tuilaepa L Sailele Malielegaoi.

Na fautuaina e le nofoa le taitai o le Itu Agai e lē faatagaina lona saunoa i ni mataupu e lē o aofia i totonu o le lipoti, ma o le tamaitai Palemia na faauilavea ma ia faailoa i le susuga Tuilaepa, e leai ni vaega o mataupu tau faiga faavae fou a le Malo o aofia i le lipoti e pei ona afea i lana lauga.

O le vaiaso na tea nei i taualumaga a le Palemene na siisii ai finagalo o le maota ona o nisi o mataupu sa afea i finagalo o le taitai o le Itu Agai ma le faipule o Faleata 3 ona o le afea o nisi o mataupu e lē o aofia i lipoti sa talanoaina.

O le mafuaaga lea na faia ai le folasaga a le Fofoga Fetalai ma ia fautuaina sui faipule e usitaia tulafono tumau i le agai sa’o o finagalo i lipoti ae aua le toe afea isi mataupu, e mafua ai ona vevesi finagalo ma tutulai ai minisita o le Kapeneta e tali i o latou finagalo.

Ua lapatai le Fofoga Fetalai ma ia faailoa e lē toe ‘aloese i le faia o le faaiuga pe a lē usitai sui mamalu.

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required