Na molimauina le faatumulia o le malumalu o le Ekalesia Katoliko o le Holy Cross i Henderson i le po anapo i aiga uo ma aumeamamae e patipatia ma molimau i le sauniga faaleaiga o le tamaitai ia Tofilau Yolande Ah Chong.
Sa maitauina le toatele o i latou na mafuta ma lea tamaitai i le tele o tausaga a o lei tuumalo le afioga i le Tootooalii.
I le lisi o le au molimau o le lotu faaleaiga a Tofilau na iai le afioga i le tamaitai Faipule o le vaega faaupufai o le Leipa ia Carmel Sepuloni, ma na ia faasoa ai i le la mafutaga ma Tofilau.
Ta’ua e Carmel, o se tagata sa lē manatu lava i lona tagata ae o se tagata na ave lava lana faamuamua i isi.
I le molimau a lē o loo faauluulu iai le Ofisa o le The Cause Collective, le tamaitai ia Rachel Enosa, e ui i le feagai ai o Tofilau ma faigata o lona gasegase o le kanesa, ae le’i ‘alo ai lava le manao o lea tamaitai e faaauau lana tautua mo ona tagata Pasefika.
Ta’ua i se laua lava faasoa na faapea atu ai Tofilau ia te ia, “E ui e lei manuia taumafaiga o togafitiga mo lona gasegase, ae o loo maua e ia le mafanafana ma le manuia i lona faatinoina o lana auaunaga i ona tagata”.
Na molimau le toatele o si ona aiga faapea sui o tagata na latou galulue i le tele o tausaga, e pei ona iai le The Cause Collective, 531 PI, Pacific Media Network (PMN) ma le Pacific Music Awards.
O le asō na faatautaia ai ona toe sauniga ma falelauasi ai i lona oliolisaga tumau.
O Tofilau o se tina ma e toatolu nai ona alo.
