O se taitai o tagata Pasifika iloga i Niu Sila nei, Pakilau Manase Lua ua faamavae mai le Kulupu Faufautua a le Pasifika i le Lakapi a Niu Sila, i le faaalia, o se mea e lē taliaina, ona e lē o iai lava se sui o tagata Pasifika i le Fono Faatonu o lea faalapotopotoga.

O Pakilau, o lona tupuaga o Tonga, sa faamavae aloaia ma lea kulupu i le vaiaso talu ai.

Sa ia faaalia ai i le Leitio Niu Sila Pasifika, o loo faia i latou e le Lakapi a Niu Sila e pei o se kulupu e leai ni nifo, leai se paoa, leai se leo toe leai se sui i le Fono Faatonu, ma ia lagona ai lona lē fiafia, ma e lē manao e na o le saofai ma faavevela ai fua le nofoa.

O le faaiuga o le vaiaso sa ia tusia ai i luga o le itulau a le Facebook le mafuaaga o lona faamavae, ma tapaina ai o ia e le Lakapi a Niu Sila e ave i lalo lea tusitusiga ae sa musu.

Sa fesootai le Leitio a Niu Sila Pasifika i le Lakapi a Niu Sila ma isi sui usufono mo ni manatu faaalia ae e lei maua ane se tali.

Ae peitai, o se faamatalaga tusitusia sa ave i le vaega o tala a le Pasifika – Pacific Media Network – sa faaalia ai e le lakapi iuni a Niu Sila, e latou te ioeina le sao tele o tagata Pasifika i luga o malae.

Ma o loo latou iloaina foi e lē o le tulaga lena o loo faailoa ai i le tutusa o sui i matafaioi, e ese mai ai i tagata taaalo, e aofia ai pulega.

Faaalia i lea faamatalaga, o loo lagolagoina e le Lakapi a Niu Sila ona sui e palotaina e tauala atu i le gasesega mo le toe faatulagana, e vaaia ai se faatinoga o pulega faaonaponei mo le lakapi, e faailoa ai suiga e tele ua iai i ituaiga o tagata eseese i Niu Sila, tupuaga ma ituaiga o tagatanuu eseese.

Sa ta’ua ai foi le amanaia e le Lakapi a Niu Sila o le Pasifika o se vaega e faamuamua mo le faalapotopotoga ma faalauiloa ai le fuafuaga faataoto a le Pasifika, le Pasifika Strategy ia Novema 2023.

Ae sa faaalia e Pakilau, e ui lava i lea fuafuaga faataoto a le Pasifika, ae ua ia iloa, e lē o lagona lava lo latou leo.

Ae o le taimi nei ua faaalia e Pakilau Manase Lua, o le mea mulimuli lava lea o le tele o faaletonu ua lē fiafia ai ma faia ai lana faaiuga e faamavae.

Sa ia logo ai i le Leitio Niu Sila Pasifika, o lana faamavaega foi ua lē o se faaiuga na fai ma le mateletele, ae o se tali i le tolu tausaga o onosai mai ai.

Sa ia ta’ua ai, sa auina atu e le Komiti a le latou kulupu se tusi i le Fono Faatonu o le Lakapi a Niu Sila e uiga i o latou atugaluga, ae e lei tali ane lava, o se mea mulimuli lena ua faia ai loa ma lana faaiuga e faamavae.

Ma ia ta’ua ai, o loo faaauau e le Lakapi a Niu Sila le leai o se faaaloalo i le sao o tagata Pasifika i le lakapi a Niu Sila, i le leai o se isi o i latou i le pulega ae poo le Fono Faatonu, e ui lava i le sao o tagata Pasifika i le lata i le 40 pasene o tagata taaalo o loo filifilia i le All Blacks, Black Ferns ma aulakapi taitoafitu.

Faaalia e Pakilau, e pau le taimi e faaaogā ai i latou pe a fia moomiaina, e pei e tilotilo ia i latou ua na o ni manuki faafiafia mo faalapotopotoga faakolone.

O le kulupu Faufautua Pasifika i le Lakapi a Niu Sila e aofia ai Eric Nima Nabalagi, Fonoti Seti Talamaivao, Laauli Sir Michael Jones, Saveatama Eroni Clark ma le tamaitai ia Seiuli Fiaoo Faamausili.