O le mae’a ai o le faamanatuina o le 100 tausaga o le kolisi o Avele e pei ona sa tumutumu ai le laumua o le kolisi i le vaiaso ua tuanai, ua faamavae ai i loifofoga o le faanoanoa tama ma teine tuai o le Kolisi ma se tasi o tama tuai sa malaga mamao mai ona o le selau tausaga.

O le susuga Misaolefalemalietoa Lolani Koko o le Pelesetene o le asosi o tama ma teine tuai o Avele i le aai o Melepone i Ausetalia ua tuumalo, a o iai o ia i le atunuu mo le faamanatuina o le atoaga o le senetenari talu ona faavae lea kolisi maualuga a le Malo.

O le afiafi o le Aso Sa ua mavae atu nei na faia ai se sauniga lotu faapitoa a le ACOPA poo le asosi o tama ma teine tuai o Avele e faamavae atu ai i se tasi o o latou sui ua fai i lagi lana folauga.

E pei ona silafua o le susuga Misaolefalemalietoa Lolani Koko o se tasi sa filifilia i le ‘au taitoafitu ma le aulakapi a le Manu Samoa i le va o le tausaga e 1983 ma le 1994.

Sa taalo foi i le taaloga lakapi liki.

O ia o se tama tuai o le kolisi o Avele sa i le aulakapi sefululima a le kolisi a o aoga ai o ia i tausaga ua tuanai.

O le Aso Faraile nei lona sauniga faaleaiga i le falemaliu o Ligaliga i Motootua, sosoo ai ma ona sauniga mulimuli i le Aso Toonai e faia i lona aiga i Malie.