Ua faamautu nei le aso 18 o le masina fou o Aperila e valaau ai mau o le tagi tau palota mai le itumalo faapalota o Vaimauga 3.

Na faailoa lea tulaga ina ua toe valaau le mataupu i le Aso Tofi o le vaiaso nei e faamautu ai tapenaga uma, a o lei suesueina mau o tuuaiga o gaioiga faatosina solitulafono mai le sui tauva le susuga Samau Leatigagaeono Solitamalii Timani Samau, faasaga i le sui faipule filifilia le afioga Lautimuia Uelese Vaai. 

O le aso 18 foi o Aperila e suesue ai mau a Lautimuia e lagolago ai ana moliaga o faatosina solitulafono i le tuuina atu o tupe tai selau tala i ni gaioiga se lua, faasaga i le tofa Lealailepule Rimoni Aiafi o le sui faipule o le HRPP, ma se tasi o tamalii sa seei i le tofi faipule o le Palemene le afioga Fuimaono Ati’ifale Te’o.

I le valaauga o le mataupu i le Aso Tofi na tatalo ai le loia mo le itu tagi i le faamasinoga mo sana faatofala’iga i le vaega o tuuaiga mai le itu o loo faasaga iai le tagi tau palota, o loo faasino i le tofa Lealailepule Rimoni, pe afai e faamaonia moliaga ua tuuaia ai, ina ia lē lipoti atu i le Palemene e tusa o aga masani o mataupu faapenei pe a faamaonia ni moliaga o se sui tauva i se palota.

O le finauga a le loia a le itu tagi le afioga Fuimaono Sefo Ainuu, e manino le Tulafono o lē o loo tuuaia e le o se tagata palota o Vaimauga 3, ae ua na o se sui mo le sui tauva o loo tagi poo se agent.

Peitai o loo teena e le loia a Lautimuia lea finauga, ma ua faatonuina ai e le faamasinoga le tatau ona tuuina atu se talosaga aloaia a le itu tagi e faamatalatala auiliili atu ai lea finauga, ma ia avatu foi se finauga tusitusia a loia a le itu o loo agai iai moliaga, e faamatala atu ai vaega o le Tulafono e mafua ai ona teena lea mau. 

Ua faatonuina foi loia a itu e lua ina ia tuu atu ma ni talosaga e uiga i le faaaliga a le loia a le itu tagi, e iai a latou molimau ua faalavelave iai le pulega a matai o le nuu o Magiagi.

O le isi vaega na faailoa e le loia a le itu tagi, o se avanoa e mafai ai ona fai mai fafo i auala o fesootaiga faatekonolosi le molimau a Lealailepule Rimoni Aiafi, ona o le taimi ua faatulaga mo le faamasinoga o loo malaga i fafo le sui faipule.

O loo tetee malosi le loia a Lautimuia Uelese Vaai i lea talosaga, ae o le a iloilo foi e le faamasinoga ma aumai sana faaiuga pe talia le talosaga pe teena.

O le amataga o le vaiaso fou e toe valaau ai le mataupu mo le soalaupuleina o ia vaega ma faamautu se finagalo o le faamasinoga, a o lei valaau molimau i le aso 18 o Aperila.

O le afioga i le Faamasino sinia, Vui Clarence Nelson ma le afioga i le faamasino o le faamasinoga sili, susuga Leiataualesa Darrel Clarke, o le a seei i le suesueina o lea tagi tau palota.