O le taumualua o se vaatau o Samoa anamua, e tauave ai se faatusa o se ilamutu o se nuu ma se itumalo faapei o se foliga o se tagata, o se manulele poo se i’a o le sami.
E mafua ona o le faatumutumuga lea o le vaai mamao ia taunuu manuia le faamoemoe o loo mafua ai ona sii taua.
Ua faailoa e le Faatonu o le laumua o a’oa’oga o le gagana faapea tu ma aganuu i le Iunivesite Aoao o Samoa, o le tāua lea o le ta’imua o le faatusa o le ao o se tagata sa ave faasolitulafono e ni fitafita o le malo o Siamani i le tausaga e 1888, ona ua toe aumai e fai ma vaaiga o na aso ma manatua ai taimi o pulea faakolone le atunuu.
O le tala mai sailiiliga a le laumua o mataupu tau Samoa a le iunivesite o loo faailoa ai, o le vaa taumualua e ana le ta’imua ua toe faafoi mai e se fale mataaga i Siamani, o se vaega o le vaatau taumualua a Mataafa Iosefo ma ana fitafita sa faamautu ma tolauapi i Matautu i Apia, i le taimi o loo va le fogavaa ma siitaua aiga tupu o le atunuu.
E iai nisi o a tatou measina e pei o meatau o taua a Samoa anamua o loo teu i fale mataaga i Siamani, o le a aumai i se faaaliga tele a le Iunivesite Aoao e faia ia Setema o le tausaga nei.
Ae o le talanoaga foi ma le Faatonu o le laumua o a’oa’oga o mataupu tau Samoa i le Iunivesite Aoao o Samoa le susuga Ta’iao Dr Matavai Tautunu sa fesiligia ai i le sailiiliga sa faia e le laumua i le falepuipui i Vaimea e pei ona iai se lipoti ua tauaao foi e le pulega o le Iunivesite ma le Malo o Samoa, ma o se sailiiliga sa faatupe e le Malo o Niu Sila.
Le Faatonu o le laumua o a’oa’oga o mataupu tau Samoa i le Iunivesite Aoao a Samoa le susuga Ta’iao Dr Matavai Tautunu.
