Ua maea faamasinoga o le mataupu gasegase a malo mo le itumalo o Aana Alofi No.2 lea ua fai si umi o finauina i luma o le faamasinoga.
O le aoauli nei na tuuina mai ai le iuga a le faamasinoga maualuga ma faamaonia ai tuuaiga e lima o le totogi tupe (bribery) na faia e Lolomatauama Eseta Mataituli faasaga i le sui o le HRPP le afioga ia Aiono Afaese Toleafoa.
Peitai o tuuaiga uma o faatosina o le faigapalota lea na tuuaia ai e Aiono le afioga Lolomatauama lea ua faaleaogaina e le faamasinoga maualuga ma na taua e Lolo i fafo ane o le potu faamasino “E viia lava le Atua ona ua i’u ma le manuia le faamoemoe ma e pei ona taua i le taimi ua sola e manumalo lava le mea moni o lea e momoli ai le faafetai i le itumalo aemaise o le faigamalo fou le Tamaitai Palemia ma le Kapeneta ae faapea le tapuaiga a aiga ona o lea ua i’u manuia le mataupu”.
Na fesiligia foi e tusitala se finagalo o le afioga ia Aiono ae na ia taua “E viia le Alii ua maea le mataupu ae e leai se mea e mafai o lea ua tuu mai le iuga a le faamasinoga pau le tulaga e faamuamua o le filemu o le itumalo”.
O le mataupu muamua lenei ua mafai ona toe alu se sui na tagi e tamoe i le faigapalota laititi ae lē mafai ona toe alu le sui na filifilia i le faigapalota i le Aso 9 o Aperila ona ua faamaonia ona moliaga.
E toe tasi le mataupu o faatosina o le faigapalota o loo tālia nei le iuga o le itumalo o Sagaga No.1, tumau pea le FAST i le 26 ae ua 18 le HRPP.
