O le pasi a Lotofaga Safata na agai i Apia, ae o le taavale mini van sa agai i Siumu, ae so’a ai e le mini van le pasi lea na mafua ai ona tifa i tua le pasi ma taavalevale.

O faamatalaga ia na tuuina atu e leoleo i le Komesina o leoleo le susuga Auapaau Logoitino Filipo e tusa ai o le faalavelave tau taavale i le aoauli o le Aso Lulu o lenei vaiaso.

Faaalia e le Komesina i se fesootaiga i le telefoni anapo, e faatoa maua se faamatalaga atoatoa i le mafuaaga o le faalavelave pe a mae’a lelei suesuega o loo faia.

O le pasese na malaga mai le pasi e le o mautinoa pe toafia ae ua na o lipoti a nisi o auala o faasalalauga na ta’ua ai e toaiva ma sa aafia i ni manu’aga ma o loo taofia nisi i le maota gasegase i Motootua mo togafitiga.

E iai foi nisi o le pasese a le mini van o loo faamanu’alia ma sa auina foi i le falemai.