E eseese lava faiga i totonu o Amerika i le faiga o latou tufaga faailoga mo i latou sa solisoli tapoleni i le taaloga o le faipele.
Ae o le isi pitonuu o Amerika e ta’ua o Atlantic City lea ua oo iai le faasologa o le latou tufaga faailoga mo i latou sa taaalo i le faipele e faatāua ai pea lo latou sao i lenei taaloga.
O tama fusu faapolofesa tautaua uma o le lalolalgi sa auai ae aifilofilo atu ai ma le alo o le atunuu le afioga ia Faumuina To’aletai David Tua.
O le polokalame lenei ua ta’ua o le Atlantic City Boxing Hall of Fame.
E ui e lei auai e nisi o alii fusu lauiloa e toalua o le lalolagi i lenei sauniga faapitoa, ae sa maualuga lava i le manatu o le afioga ia Faumuina To’aletai David Tua lenei faaaloalo.
O le tele o sauniga faapenei e auai atu iai le afioga ia Faumuina i totonu o Amerika, e manatua ai pea e lenei alo o le atunuu nisi o mātua poo i latou sa muamua atu ia te ia sa latou muai asaina le gasū o le taeao i lenei taaloga.
Saunoa le afioga ia Faumuina e iai nisi o tupulaga talavou e pei e manatu i lenei taimi o David Tua, David Tua, ae galo ia i latou e iai nisi sa muamua atu ia te ia, sa sili atu ona faigata le latou vaitaimi sa taumafai mai ai nai lo le taimi lea ua pale mai ai i lenei taaloga.
E sili atu foi i lona manatu le faatāuaina o le latou foi vaitaimi faigata auā ana leai i latou e leai se taeao i lona foi taimi.
O le fautuaga a le afioga ia Faumuina To’aletai David Tua i nisi o alo o le atunuu o loo agai mai i lenei taaloga, aua ne’i gata le taumafai i le maualuga o loo iai.
Aua foi ne’i sau se isi faapea mai e tatau ona ou pei o David Tua, leai e tatau ona sili atu nai lo David Tua, ia maualuga le tulaga e tatau ona iai auā e agai mai isi tupulaga e mafai foi ona tilotilo ia tupulaga i le latou vaitaimi.
E faafetaia ai e le afioga ia Faumuina To’aletai David Tua le tapuaiga a le atunuu faapea ona aiga ona o nei faamanuiaga o loo ia maua a o iai i le taimi o le taaloga faipele.
