Ua saunoa manino le susuga ia Laufiso Tomasi Peni o ia o le Samoa Labour Mobility Liaison Officer e toe faamalamalama ma faamautu nisi o taiala mo i latou o loo agai mai mo galuega faavaitaimi i totonu o Niu Sila.
O le taimi nei ua siitia le fuainumera o tagata o lea ua malaga mai i galuega faavaitaimi, ma ua manatu ai le malo o Samoa ua tatau ona lua ni sooupu i totonu o Niu Sila, o le tasi i Hasting ma le tasi i le South Island.
Mo i latou uma e fia talosaga i le galuega faavaitimi e tuuina atu lea a latou tusi talosaga i Samoa i le nofoaga autu i Apia i Samoa.
Ae o loo faamanatu i tagata o lea ua agai mai i galuega i le taimi nei, o latou lavalava e tatau ona faaaogāina i le tau o loo galulue ai.
O loo iai aumalaga o lea ua toe foi ae o loo iai foi malaga o loo totoe, ma na ta’ua e Laufiso Tomasi Peni e na o le tolu lava ato e mafai ona faatagaina pe afai ae tele ni mea e ave mo aiga i Samoa.
E 7kilo le mamafa o le ato e ave i luga auā e pei ua maitauina e le ofisa o le Air New Zealand e oo loa i le taimi e toe foi ai malaga a le RSE i Samoa e tele lava ina fua atu ato ua ova, ona toe tuu ese lea o isi oloa ona ua ova.
E fitu masina o loo mafai ona tuuina i le tagata e mafai ai ona malaga mai, ma e lē mafai ona e toe apalai i se isi visa, poo se visa tafao.
Ma o lea vaega seiloga lava e te toe foi i Samoa faatoa mafai lea ona e toe malaga mai i se isi lava visa.
O le sola i le malaevaalele, o se mea e lē lelei, vaega muamua o le ta’uvalea lea o lou tagata, lua o le tuuina atu lea i lou aiga e saili mai oe poo fea o e iai, ma lona tolu o le tuuina atu lea o lou igoa i le ofisa i Samoa ma aveese mai ai lou igoa ma le polokalame o galuega faavaitaimi, faatasi ai ma le tuuina atu lea o oe i le ofisa o leoleo ma le ofisa o le immigration a Niu Sila ma Ausetalia e toe tipoti oe i Samoa.
O le sainiina o konekarate i galuega o loo malaga mai ai, e lē mafai ona toe suia se vaega o le konekarate i atunuu i fafo, e pei o le totogi amata, o le taimi amata ma le taimi manava, ma isi lava vaega o loo sainiiina i luga o pepa.
E lē mafai ona faatagaina se tagata ona moe pe nofo i tua i aiga ae tuu le togalauapiga na malaga faatasi mai ai.
E lē mafai ona faatagaina le olaga mulilua poo le toe suia o lou toalua i polokalame o galuega faavaitaimi, o le tuualalo lea o loo tuuina mai e Laufiso Tomasi Peni auā ua iai mea ua tutupu i lea tulaga.
O le visa o le RSE e saili ai le lumanai manuia ae lē o le saili ai o se isi ou toalua, a maua le tagata ua faia lea tulaga e lē mafai ona toe sau i nei polokalame.
O le tagofia o le ava malosi ma laau faasāina o isi ia sā e lē mafai ona taliaina i totonu o galuega.
O le susuga ia Lufiso Tomasi Peni o loo galulue soosoo tau’au faatasi ma le afioga i le Komesina o Fefaataua’iga ia Vaatu’itu’i Apete Meredith i le vaaiga o polokalame a le RSE faatasi ai ma ni mea e tutupu poo ni faafitauli ogaoga e ono tulai mai i totonu o polokalame a le RSE i Niu Sila atoa.
