Ua faamatuu mai e le matagaluega o le soifua maloloina se faamanatu ina ua aliae se tasi ua aafia i le monkeypox lea ua faapuupuu i le mpox.
O loo faamauina lea tagata i Vitoria mo le uluai taimi lenei i totonu o le 6 masina.
Fai mai le matagaluega e lē o iai se sootaga o le tagata ua aafia ma ni tagata malaga mai fafo ma e iai le masaloga o lona uiga o lea ua pepesi lava i le atunuu.
Saunoa le sui ofisa sili o le soifua maloloina, Christian McGrath e tāua le taimi lenei e mataitu ai auga o le mpox, e mafua mai i se vairusi ma sa matuai pepesi i le 2022.
O le tausaga lea na faamauina ai tagata e toa 70 i Vitoria na aafia ai ae na vave ona toe faaitiitia ina ua faia tuipuipui. Fautua mai fomai afai ua aafia, e sili le aumau i le fale ma faaitiitia fesootaiga ma isi auā e vave tele lona pipisi.
