O le Aso Gafua o le vaiaso nei le aso 11 o le masina lenei o Novema na atoa iai le 106 tausaga talu ona faamuta le Taua Muamua a le Lalolagi, ina ua saini se maliega i lea aso e malo uma na auai i le ulua’i taua o le lalolagi ina ia taofia ae tausi le nonofo filemu ma fealofani.
O se aso tāua tele auā ua faaalia i faamaumauga e 122 fitafita mai Samoa na maliliu i le Taua Muamua a le Lalolagi e pei ona iai le maa faamanatu o loo i le uati tele i Apia, lea foi o loo manatua ai fitafita na maliliu i le Taua Lona Lua a le Lalolagi.
O le 11 o le taeao o le Aso Gafua o le masina 11 o Novema 2024 na faia ai le sauniga i lalo o le uati i Apia na tauaao ai pale ma teu fuagalaau e manatua ai fitafita e silia i le 8 miliona na maliliu ai i le Taua Muamua a le Lalolagi.
Sa auai le Pelesetene o le asosi o fitafita sa i le taua le afioga i le Sui Palemia, faapea foi sui o Malo o Niu Sila ma Ausetalia.
I faasalalauga a le ofisa o le sooupu a le Malo na faailoa ai e le Pelesetene o le asosi o fitafita sa tautua i le taua se tala otooto o lea aso faamanatu ma lona tāua.
Le Pelesetene o le RSA poo le asosi o fitafita sa i le taua le afioga Tuala Tevaga Iosefo Ponifasio, o ia foi o le Sui Palemia o le Malo.
