Pe ana le oso faalava le fa’amai o le misela na fano ai ola ma soifua e 80 ma ona tupu, ma sosoo ai ma le pepesi o le fa’amai o le Koviti 19 i le lalolagi, semanū faapenei ua fausia le uafu tele i gataifale o afioaga o Vaiusu ma Vaitele, lea sa avea ma se tasi o fuafuaga a le faigamalo sa iai, ao avea le Ta’ita’i o le Itu Agai ma Palemia le susuga Tuilaepa L Sailele Malielegaoi.
O le tausaga e 2019 na fuafua e faalauiloa ai le amata fausia o lea atina’e tele, peitai ona o fa’amai pipisi na aafia ai Samoa le mafuaaga na lē tino ai lea fuafuaga e pei ona sa iai le faamoemoe e auai le Ta’ita’i o le Malo o Saina le Pelesetene o Xi Jinping. Ua toe faamanatu e le ta’ita’i o le itu agai lea galuega i lona taimi, ona o le fuafuaga a le faigamalo ua iai nei e tapunia lē tumau le uafu tele i Apia i le vaiaso o le fono a Malo o le Taupulega ia Oketopa.
Ua mafua lea faaiuga ona o le a taula ai se meli tele o le a nonofo ma faamautu ai nisi o usufono ma tagata o le a le maua ni avanoa i faletalimalo tu taulaga o le atunuu. Faaalia e Tuilaepa i sana tusi i le Faatonu poo le Letter to the Editor, o le fausia o le uafu i gataifale o Vaiusu ma Vaitele ana tino mai semanū e telē le avanoa e taula ai vaa tetele ma faaauau ai pea ona le motusia auaunaga tau fefaatauaiga.
O le Malo o Saina sa faamoemoe na te faatupe le fausia o le galuega o le uafu sa fuafuaina. E pei ona silafia ina ua pale mai le faigamalo a le Faatuatua i le Atua Samoa ua Tasi, na taofia lea galuega ona o atugaluga ma popolega i aafiaga o le gataifale ma le siosiomaga aemaise e ese foi a latou faiga faavae, e pei ona taofia le aumaia o le vaalele tele 737 800 mo malaga a le Samoa Airways agai i Niu Sila ma Ausetalia. O le taimi nei o loo faaauau ona totogi aitalafu tuua a le Samoa Airways sa lisi mai ai isi vaalele tetele.
