O le Hai Komesina o Niu Sila i le UK ua faamālōlō mai lona tofiga i le mae’a o lona fesiligia o se tulaga e faatatau i le Peresetene o Amerika i se sauniga sa faia i Lonetona.
Ua lipotia e le 9News sa faia se saunoaga a Phil Goff i le Chatham House i le Aso Lua o le vaiaso nei ma ia faia ai se faatusatusaga i le va o taumafaiga a Trump e faamuta le taua i le va o Lusia ma Ukraine, ma le maliega na sainia i le 1938 i le va o le Palemia sa iai o Peretania, Neville Chamberlain ma ta’ita’i o Farani ma Siamani.
O lea maliega na maua ai le faatagana e ave faamalosi ai e Adolf Hitler se vaega o Czechoslovakia ma osofa’ia ai loa i le tausaga e sosoo ai e le NAZIS le atunuu o Polani ma mafua ai le Taua Lona Lua o le Lalolagi.
O le faamatalaga a Goff ua ia fesiligia ai gaioiga a Trump pe malamalama i le talafaasolopito.
Ua lipotia o le mae’a o le faamoemoe lea ua ta’ua ai le faamālōlō e le minisita o le va i fafo a Niu Sila, Winston Peters, o le susuga Phil Goff mai lona tofiga, fai mai Peters e na te faia foi le faai’uga lea pe ana faapea o ni faamatalaga faapea ua faia foi faatatau i isi atunuu.
Fai mai Peters o le tagata e tula’i mai i le tofiga e pei ona iai Goff o loo fai ma sui o le malo Niu Sila ma faiga faavae o loo faatino i le taimi nei ma o ia o le foliga o Niu Sila.
Puna o Faamatalaga: https://www.9news.com.au/world/donald-trump-update-phil-goff-new-zealand-envoy-to-uk-fired-questioning-us-president-knowledge-history/44b15aa2-db8d-40ef-b590-ad1c0edf1f35
