O le a faaauau pea ona faalogoina e Hawke’s Bay mafuie laiti i le uma ai o le mafuie malosi na lūlūina i le taeao ananafi.
E 5.9 le malosi o le mafuie muamua na faalogoina ananafi i le 19 minute e te’a ai le 10 ma e faapea e 22km lona loloto ma na faamatalaina o se mafuie e malosi tele.
E 4 minute mulimuli ane ae toe faalogoina le isi e tusa lona loloto ma le 13km ma e 5.4 le malosi.
Talu mai le uluai mafuie ua faamauina ua silia ma le 80 isi lūlūga na faalogoina ma ua sau ai le lapataiga e ono faaauau pea ona faalogoina nisi mafuie laiti mulimuli mai i vaiaso a sau faasolo atu i le faitau masina.
E faafetaia e ui i le tele o lipoti e malolosi mafuie na faalogoina, peitai e le iai ni lapataiga o se sunami.
