Ua faamatala e le tamā le tofa Lepapa Sosaiete Matai o le afioaga o Futiga i Amerika Samoa le atoaga o le mea na tupu ina ua tulaueleele i le malaevaalele i Tafuna se malaga a le Talofa Airways i le amataga o le vaiaso nei lea sa malaga ai ma lona toalua le tausi o Matasaua Matai, faapea le isi toaono o le pasese e aofia ai se ulugalii ma le la fanau e toatolu ma se tamaitai papalagi.
Na tulaueleele le vaa ae faaletonu ai le pa o le pa’u pito i luma o le vaalele, ma na faaalia e Lepapa o le alofa o le Atua ma le to’a o le pailate na lē tupu ai se isi tulaga ogaoga i le vaalele.
O Lepapa ma lona tausi sa usufono i le Koneferenisi a le Ekalesia Metotisi na mae’a i le Aso Sa na te’a nei, ma o le toe foi atu i Amerika Samoa na tupu ai le faaletonu i le vaalele na malaga ai.
O se talanoaga lenei ma lea tamalii i auala o fesootaiga televavave faaonaponei.
O le faaletonu na tupu na faaalia foi e Lepapa e lei oo atu se faamatalaga mai le kamupani vaalele talu mai le faalavelave na tupu.
Sa ia faailoa foi le tuai ona tali atu o le auaunaga laveai i taimi o faalavelave faafuasei i le malaevaalele.
Le tofa Lepapa Sosaiete o Futiga i Amerika Samoa, o ia faatasi ai ma lona toalua sa aofia i le aumalaga a le Talofa Airways i le Aso Gafua na tupu ai le faaletonu i se tasi o pa’u o le vaalele o le kamupani vaalele o le Talofa Airways.
E lei manuia sailiga mo se faamatalaga mai le pulega o le kamupani vaalele.
