Ua faailoa e le pulega o le kamupani telefoni feaveai ma fesootaiga televavave o le Vodafone Samoa, o le latou auaunaga o le a faaaogā ai le fesootaiga o le 5G, o le a faaola i se taimi o le tausaga nei a o lei amatalia le fono a Malo o le Taupulega i le masina o Oketopa o le tausaga nei.
O lona uiga o le a mafai ai i le saoasaoa o lea fesootaiga faaonaponei ona faafetaui le manaoga i le faasalalauina o faamatalaga ma isi vaega tāua o lea fonotaga.
E 13 miliona tala o le a faatupe ai e le kamupani o le Vodafone le fausia o ana pou fou e 6 o fesootaiga mo le vaega muamua o lea galuega auā fesootaiga i le 5G, ona mulia’i lea i le vaega lua poo le phase 2 o le a faaola ai isi pou o fesootaiga ina ia faasopolia uma ai le atunuu atoa.
Ua faailoa e le pulega o le kamupani o le a sili atu ona lelei le auala fou o ana fesootaiga ma o le a maua foi i se tau maualalo.
O le vaiaso na tea nei sa aloaia le faalauiloaina o le fesootaiga 5G a le Vodafone i se saunoaga mai le taitai o le Malo le afioga i le tamaitai Palemia.
