O le avanoa tāua na faafoeina ai e Matagaluega o le Malo e fitoitonu ma lenei polokalame faatasi ai ma le Faalapotopotoga o Taumafa i le lalolagi se aoaoga mo le itumalo a Manono Tai.

O lenei aoaoga e faasoa ai i le aoga le tāua o le faaaogāina o upega tafailagi ma auala tekonolosi e faailoa ai maketi aemaise o faamatalaga ma faamaumauga i vaega tau faatoaga.

Ua afua lenei faamoemoe ia faafaigofie ai ona maua faamatalaga ma faamaumauga moomia e lenei vaega o le atunuu i itu tau faatoaga aemaise o le silafia i vailaau ma meafaigaluega e moomia mo atinae o faatoaga nai lo le malaga mamao atu i le Matagaluega i le taulaga.

Na tufaina ai nisi o vaega mo faatoaga mai le Faalapotopotoga o Taumafa a le lalolagi ma le faamoemoe ia unaia pea le faaaogāina o auala faatekonolosi ina ia faigofie ai ona silafia e le mamalu o loo alala i lea vaega o le atunuu faamatalaga aemaise o auaunaga a le Matagaluega pe a moomia.