Ua 36 tausaga o le susuga ia Lauvale Leti Leti mai le afioaga o Faleapuna, Lano ma Lalomauga i Samoa, ae o loo aumau nei ma si ona toalua ia Tulipe Faanene ma ona alo e toalua i Brisbane i Ausetalia.
O le afiafi o le Aso Toonai ua mavae atu nei 12 o Aokuso na faataunuuina ai le fusuaga a le susuga ia Leti Leti ma le alii fusu ia Robert Berridge i le ABA Stadium i Aukilani, ma sa vaaia ai le faatumulia o lea malae i le mamalu o le atunuu ma aiga sa agai atu e maimoaina taumafaiga a le susuga ia Leti e pei ona malaga mai ai i Niu Sila nei, ma se’i latou toe tilotilo poo iai se suiga o le fusu a lea alo o le atunuu auā o lea ua lua tausaga talu ona tautau ana mea faipele e lei toe fusu i se paga mamafa.
Peitai i lea afiafi na faate’ia ai lava le maimoa a le atunuu, i le mae’a o taamilosaga e 4 o le taaloga ae o loo tumau pea le malosi o lea alii i le faatinoina o lana fusuaga.
O le taamilosaga lona 5 na se’i ai loa e Leti Leti le uaea ola o le palaka a le susuga ia Robert Berridge ma mae’a ai loa le taaloga.
O le fiafiaga o le susuga ia Leti ona ua manumalo lana fusuaga na malaga mamao mai ai ma si ona toalua ma lana fanau aemaise o si ona tuaa ia Emelio Leti na malaga mamao mai lava i Samoa ona o le fia tapuai i taumafaiga a si ona alo.
Saunoa Leti Leti o lana faafetai i le tapuaiga a o la aiga faapea le atunuu ona ua iu ma le manuia ana taumafaiga.
Ma ua avea foi lona toe foi mai i le maea ua faatuputupu ai pea lona naunau e faaauau lana taleni aemaise o le faasoaina lea o lana taleni i nisi o alo o le atunuu lea ua autovaa atu e faaaogā lana gym ua amata nei i Brisbane i Ausetalia.
Ua faatolu ona litaea le susuga ia Leti mai le taaloga, ae lē mafai lava le valaau atu o nisi o tama fusu ia te ia e sau e fusu ma lea tagata pe manaomia se tama fusu.
O le tapenaga a le susuga ia Leti i lana fusuaga na se’i mavae atu nei, e lei iai se faiaoga na fesoasoani mo ia, sa koleni lava ia i lana gym i le 8 vaiaso ma toe faaaolaola nisi o metotia ma auala o loo ia iloa i le fusuaga, aemaise o le fesoasoani a le susuga ia David Tua ia te ia i le taimi na faatoa tau amata ai lana taaloga i totonu o Niu Sila.
Ma o se mea lelei lea ua ia faia mo lona aiga ma alo o le atunuu, o le faia o lana gym e faaauau ai ana koleniga ma fesoasoani ai i nisi o alo o Samoa i Ausetalia.
O le afiafi o le Aso Sa na toe taliu atu ai lea alo o le atunuu ma lona aiga i Ausetalia i le mea ua faamautu ai nei ma lona aiga, ma toe faatalitali pe iai se isi valaau atu mo ia.
