Ua tele tausaga o faatino pea le faamanatuina ai o lenei faamoemoe i tausaga taitasi e pei ona faatino ai le sauniga faapitoa e manatua ai i latou o loo aafia i le faama’i o le kanesa o le susu, o galuega auā le puipuia ai o le atunuu mai lenei faama’i.

O le Sosaiete o le Kanesa i Samoa o i latou o loo nafa nei ma le mamalu o le atunuu o loo saili fesoasoani i faamatalaga e vave sailia ai togafitiga.

Saunoa le Minisita o le Soifua Maloloina, Valasi Luapitofanua Tafito Selesele i le uiga moni o lenei aso e tomua ai le faamanatuina o le vaiaso o lenei faamoemoe ma lona autu e faapea ia tasi i suiga manuia.

“O le masina lenei e faasino tonu lea i puipuiga o aoaoga ma laeiina ai le laei piniki a soo se tagata e tatou te tutu faatasi ai ma tetee atu i lenei faama’i.

“Ua 21 tausaga talu ona faavaeina le sosaiete o le kanesa i Samoa ma e le o mapu la latou galuega fita o loo feagai ai nei ma o le masina lenei o le faamoemoe tele lea e ala i polokalame ma aoaoga e taulogologo ai pea le atunuu i auga ma aafiaga o lenei faama’i ae le gata i lea o le faalauiloa i tina ma tamaitai le tāua o le togafitia vave o le kanesa o le susu.”

E pei ona ta’ua e Valasi e le gata i le kanesa o le susu ae o isi ituaiga o le faama’i kanesa ma o le fuainumera o le atunuu o loo aafia i le kanesa ma resitalaina i le sosaiete o loo faailoa ai le tulaga maualuga o tina ma tamaitai o loo aafia.

“O le mataifaioi ma le tiute a lo tatou atunuu o le fesoasoani lea i le auaunaga a le Matagaluega o loo faatino ina ia faaitiitia ai le fuainumera o i latou aemaise tina ma tamaitai o loo maua i le faama’i o le kanesa.”

“Ou te fiafia e faailoa atu o le avea ai o le faatamā o lenei sosaiete o loo taumafai pea le pitolaau a le sosaiete e ala i ana galuega faatino e tuuina atu faamatalaga ma faamaumauga manino i le Ofisa o le Soifua Maloloina.

“O loo tele foi le sao o lenei sosaiete e ala lea i fonotaga ma faatalanoaga i lenei faama’i, o le fuafuaina o le taumafa tapaa ma nisi o faama’i o loo tuuina atu ai lo latou sao tāua.”

Ta’ua e Valasi e manaomia le lē toe vaaia o nei faama’i i le atunuu ae peitai ua autausagā faatoa taunuu lenei manaoga.

“E faaauau pea le auaunaga a le Sosaiete o le kanesa ina ia mautinoa le saogalemu ma le puipuia o le atunuu mai lenei faama’i pe ua aafia foi e tu malosi pea lenei sosaiete ina ia tuuina atu le fesoasoani ina ia togafitia vave lenei faama’i.

“E pei foi o le pitolaau a le Soifua Maloloina o le saili fesoasoani lea e tuuina atu ai i latou ua aafia e faatino ai togafitiga i atunuu e mamao.”

Na foai ai e le faletupe a le A.N.Z le seleni e $10,000 mo le Sosaiete auā le fesoasoani ai i la latou auaunaga.