Mai le aso muamua o Iulai o le tausaga e 1999 e oo mai i le Aso Gafua o le vaiaso nei le aso muamua o Iulai o le 2024, ua atoa iai le 25 tausaga talu ona faavaeina e le Malo le tasi o ana auaunaga tuma’oti o le Pulega o Uafu ma Taulaga le Samoa Ports Authority.

O le samiina o nei tausaga e tele poo le iupeli siliva o lea tautua a le Malo ua latou ofoina ai le meaalofa o se dividend e 25 miliona tala mo galuegafai a le malo, e pei lava o meaalofa faapea o loo tuuina atu mo ia galuega e isi auauna tuma’oti a le Malo.

I se pepa o faamatalaga ua faailoa ai e le pulega o uafu ma taulaga o le tausaga e 2017 na toe tulai mai ai ana tupe maua i se tulaga lelei ma faapena ona gafatia ai ona tuuina atu lona sao tau tupe e ala i dividends e faatupe ai galuegafai a le Malo.

O lea auaunaga tuma’oti a le Malo o loo vaaia le atina’e o le malupuipuia o o tatou uafu autu faapea isi uafu laiti o loo faaaogā i malaga i le va o motu.

Ua ave le faafetai a le Ofisa Sili o pulega le afioga Sooalo Falelima Kuresa Sooalo i ana paaga faapisinisi aemaise o le Malo i le lagolagosua i ana taumafaiga uma mo le siitia o lana tautua.