O le mae’a ona folasia i luma o le afioga i le Faamasino Sili le afioga Satiu Simativa Perese o le talosaga toe iloilo poo le apili a leoleo ua lu’i ai le faai’uga a le Faamasinoga Faaitumalo na faasala tupe ai se tagata sa galue i le ofisa o le tiute, i le faamaonia o ni ona moliaga o le aumai faasolitulafono i le atunuu o ni oloa na nanā mai ai ma le pauta faasāina o le aisa, o lea ua faatonuina e le Faamasino Sili loia a itu auai e tapena atu nisi o finauga faaletulafono e faia iai le iloiloga.

O Pueleo Junior Sefululua na faasala ia Novema o le tausaga na te’a nei i le 3 afe tala i moliaga e lua na faamaonia e aofia ai le solitulafono o lona faaulufale mai i Samoa o le aisa e tusa lona mamafa ma le 904 kalama.

O lea faasalaga tupe o loo aiaia a lē usitaia le 14 aso e totogi uma ai, e 6 masina e nofosala ai i le falepuipui.

O loo apili e loia a leoleo lea faasalaga i le finauga ua lē talafeagai ma fetaui ma faasalaga.

O loo iai le apili a lē ua molia faasaga i le faamaonia o ona moliaga ma o le a suesue faatasi ma le talosaga apili a leoleo.