O lea ua faailoa aloa’ia mai e leoleo suafa o i latou e toatolu ua maliliu i le faalavelave faafuase’i na tula’i mai ina ua lavevea faatasi se loli ma nisi taavale i luga o le State Highway 1 i Ramarama i Aukilani i le aoauli o le Aso Gafua nei.
O i latou nei o Faaofo Uili Faaofo 45 tausaga o le soifua, Leauga Jerry Leauga 37 tausaga o le soifua, ma Taavao Kelemete 32 tausaga o le soifua.
I se lipoti i le NZ Herald o loo ta’ua ai se faamatalaga a le aunty o alii ua maliliu e faapea, o Leauga ma Taavao e uso o la tina, ma o Faaofo o le tuagane lea o la tina, e omai uma i latou mai le afioaaga o Sili i le motu i Salafai.
Na ta’ua e le aunty, o si ona tuagane o Faaofo, o se uncle e naunau tele e tausi fanau nei a nai ona tuafāfine mai Samoa, o lea foi na ofo ai e malaga i Bay of Plenty e piki mai nai ona nephews e aumai i luga se’i fai sa latou fiafia ma alu e faatafafao solo i Aukilani ma tapena ai le toe foi atu i Samoa i le Aso Tofi o le vaiaso nei.
E iai le isi e toatolu ai i latou le tausoga, o le uso laitiiti o Leauga o lea e taofia i le falema’i i manu’aga tuga ma e na te lē o iloa o lea ua maliu si ona uso matua, ma e oo mai le taimi na tuuina mai ai le lipoti lenei i le NZ Herald, e lei ala ane lava le uso laitiiti lea.
O loo faaauau pea suesuega mae’ae’a a leoleo i lenei lava faalavelave, ae i se lipoti a leoleo o loo ta’ua ai o ni uluai faamaumauga o loo ta’ua ai se loli na aga’i atu i le itu i Saute na pasae le pa’u ma tifa atu ai le loli aga’i i le itu auala o loo omai ai taavale e aga’i i le itu i Matu, ma feto’ai ai ma le van lea sa faimalaga mai ai nai alii faigaluega faavaitaimi, faapea ma nisi foi taavale na lavevea ai ae sa na ona faamanu’alia o i latou sa iai i isi taavale ae leai se tasi na fano se soifua vagana le pasese a le van.
Faamaopoopo se fesoasoani tau seleni mo le tapenaina o le toe aveina i Samoa o tino maliliu
O le tula’i mai o lenei faalavelave ua aafia ai soifua o nisi o tamafanau a Samoa a o iai i sailiga manuia i lenei atunuu, ua galulue faatasi ai nei le Fono Faufautua a Samoa i Aukilani, le PLF (Pacific Leaders Forum), ma le Mafutaga Soofaatasi a Faafeagaiga, i le mae’a ai o se feiloa’iga ma le afioga i le Konesula Aoao o Samoa i Aukilani, faapea le Komesina o Fefaataua’iga a Samoa i NZ, o lona ofisa tonu e nafa ma le vaaia o le polokalame lenei o galuega faavaitaimi, ina ia saili se fesoasoani tau seleni e tapena ai le toe faafoi atu o tino maliliu o i laua nei i o la aiga i Samoa.
Sa faatalanoa le aao tusitusi o le Fono Faufautua a Samoa, Leiataua Savea i le taimi o le polokalame Drive Time a le Radio Samoa e le afiga Fofogamua Francis Ioane i le aso ananafi, ma ta’ua ai e Leiataua, o lea ua faatulaga se GoFundMe page ua faaigoaina, o le Samoa RSE Support Fund (Regional Seasonal Employment Scheme), ma o le numera o le tusitupe o le a teu atu i ai ni fesoasoani tau seleni, 02-1246-0600844-003 (Co-oprative Bank).
O le numera telefoni 0212947927 e mafai ona faafesootai ai le afioga Leiataua Savea Peseta mo nisi faamatalaga atili o lenei fuafuaga mo le faamaopoopoina o se fesoasoani e tuuina atu i aiga o i latou ua maliliu aemaise lava i nai alii e toalua na malaga mai Samoa.
O latou tino maliliu o le a taooto i le maota faasausau o Ligaliga i Magele, ae o le a toe logo mai se nofoaga o le a faatulaga ai se sauniga e manatua ai i latou nei poo se Memorial Service a o lei molimoli atu tino maliliu o nei tamafanau a Samoa i le atunuu ma aiga o loo taputapua’i mai.
