O loo ave le faamalo a le Leipa ma le Greens i ta’ita’i Kerisiano mo lo latou lē taliaina o le Treaty Principles Bill peitai ua faailoa e le ta’ita’i o le ACT, David Seymour e lē o se taimi muamua lea ua taumafai ai ekalesia e taofia tagata mai le faaleo o finagalo i ni ana faiga faavae.
Lipotia e le RNZ ua faailoa e Seymour o le taimi muamua na tupu ai foi lea tulaga o le mataupu e faatatau i le End of Life Choice Act, ma e faafetai ona sa tuu le avanoa i tagata e fai ai le mea e manatu iai ma e faamoemoe se isi o le a faapea foi i le faiga o le Treaty Principles Bill.
O le asō ua lipotia e oo ai i le Kapeneta se kopi, draft version o lea pili ma e toeitiiti 450 ta’ita’i faakerisiano ua saini ai i se tusi ua valaau ai i faipule ina ia teena lea pili.
O le tusi na faamatuu ane mai le Common Grace Aotearoa ma sainia e ta’ita’i Katoliko, Metotisi, Salvation Army ma Vineyard denominations.
Faailoa e le sooupu a le Leipa i mataupu tau Maoli, Willie Jackson ua fiafia i gaioiga ua faia e ta’ita’i Kerisiano i le mataupu lea ma lo latou lototoa.
O le pili e pei ona ta’ua sa tuufaatasia e le ACT NZ ma le faamoemoe e toe faamanino atili ai faiga faavae o le Treaty of Waitangi ma ua faailoa e tolu ni ona vaega tāua, e iai le aiātatau a le faigamalo a Niu Sila e pulea ai tagata uma o Niu Sila, amana’ia e le faigamalo tagata Niu Sila ma o latou fanua ma meatotino ma e tulaga tutusa uma tagata Niu Sila i lalo o le tulafono, tutusa i aiātatau ma tiute.
O loo tulimata’ia e le to’atele le faasologa o lea pili.
Puna o Faamatalaga: https://www.rnz.co.nz/news/political/527427/david-seymour-hits-out-at-church-leaders-over-treaty-principles-bill
