O lea ua aumai faalauaitele e le Faatonu Sili o le
Soifua Maloloina faamatalaga tusitusia o aiaiga faalesoifua maloloina mo le puipuia ai o Samoa a’o lumanai le toe faia o Malaga faapitoa e toe foi atu ai tagata o le atunuu i malaga mai Niu Sila.
O le faaiuga a le kapeneta i le vaiaso ua mavae ua faatulaga ai le toe faia o se malaga faapitoa i le Aso Tofi o le vaiaso nei mo pasese na faatulaga e foi mai i le Aso 26 o Aukuso ae na taofia ina ua toe pēsia Niu Sila aemaise lava i le aai o Aukilani i auga o le faama’i Koviti 19.
Mo tagata malaga o le a toe foi atu i Samoa i lenei vaiaso lea ua faailoa e le tōfa Leausa Dr Take Naseri o le a le mafai ona toe foi atu i latou na maua i le faama’i sei vagana ua usitaia aiaiga e pei o le tuanai o le 6 masina talu ona aafia i auga ae o loo maua le taunuuga o ana suega poo tests e leo toe nofo ai le vairusi o le koviti19.
E tatau foi ona maua atu le taunuuga o suega e tolu e leo toe aafia i totonu o le 14 aso ao lumanai le toe foi atu i Samoa.
O le taunuuga foi o ia suesuega faafomai e aofia ai ma le siakiina o le toto ia imeli sao i le Faatonu Sili Aoao o le Soifua Maloloina ma le sui Faatonu Sili.
O le lē faamalieina o nei aiaiga o le a taofia ai se tagata malaga e ulufale i le vaalele. O pasese uma foi e malaga atu i Ausetalia aemaise mai NSW o Niu Sila, Initia ma atunuu o loo malosi ai le pepesi o le faama’i e ao ona faanofoesea i se atunuu e le’o malosi ai le faama’i ma e lei oo foi iai le vairusi pipisi o le Corona le Delta variant mo le umi e 28 aso.
