O loo tapena le faalapotopotoga tuma’oti o le Toomaga mo ē Puapuagatia e faia se sauniga faapitoa i le Aso Faraile o le vaiaso nei le aso 4 o Oketopa, e manatua ai le teineitiiti o Sanarosa na feagai ma mafatiaga o sauāga tau feusuaiga na i’u ina fano ai lona ola.
O loo tuli nei le faasalaga faafalepuipui 20 tausaga o lona tamā na molia i le faia o ia sauāga.
O lea sauniga e pei ona faailoa e le Toomaga i se pepa o faasalalauga, o le a avea foi ma mutaaga o taumafaiga uma sa faatino e fesoasoani ai ia Sanarosa a o feagai ma mafatiaga, aemaise o le galuega sa feagai ma leoleo o le su’esu’eina o le solitulafono.
O se mataupu ua tusa ma le lima tausaga o faatali sailiiliga a le faamasinoga i mau, seia oo ina faamaonia tuua’iga o le tama o le teineitiiti.
O le fe’au tau molimoli mo le atunuu atoa mai lea mataupu tau faamasinoga e pei ona faailoa e le Pelesetene o le Toomaga, ia galulue faatasi tagata uma e tetee ma tafiesea soo se sauāga faasaga i fanauiti.
