O le faamoemoe o le Aukilani Samoa Business Expose o le taumafai lea e atia’e ma galulue le tele o pisinisi Samoa i totonu o Niu Sila, aemaise lava i Aukilani.
O le polokalame na amata i fonotaga e aofia ai le tele o pisinisi o loo pulea lava e tamafanau o le tatou atunuu, ma le naunautaiga e iai le aso e mafai ai ona fai se faaaliga o nei auaunaga uma a le atunuu ina ia mafai ona o atu o tatou tagata e maimoa iai ma faatau a latou oloa.
O le Aso Toonai ua mavae, 22 o Iuni na maitauina ai le tulaga maualuga ma le matagofie o le limalima lelei o tatou tagata e ala ia latou oloa o loo faatinoina i totonu o a latou pisinisi i le faaaliga lea sa faia i le maota o Samoa i Magele.
O nisi o pisinisi o lavalava Samoa na faailoa ai le manaia o mamanu o le suiga o ofu, o sei o tamaitai faapea nisi o mea taulima eseese o loo gaosia lava i totonu o le tatou atunuu.
O nisi o faalapotopotoga ma aiga sa faatau a latou meaai auā o isi ia vaega o loo mafai ona agai iai le latou taumafaiga o le gasesega o taumafataga.
O le uluai taimi lea ua faataunuuina ai lenei polokalame o loo taulamua ai nisi o tamalii o le atunuu le afioga ia Toleafoa le Tasi Market faapea le afioga ia Sala Lauano ae lagolagosua iai le afioga i le Konesula o le tatou malo i Aukilani ia Afemata Palusalue Faapo II.
O loo iai le faamoemoe e mafai ona faaauauina lenei polokalame i faaiuga o masina taitasi auā lava le faailoaina o oloa ma pisinisi a le tatou atunuu i Aukilani.
O loo aumai pea le tuualalo a i latou o loo faatinoina lenei polokalame e tatau i pisinisi uma ona resitala aloaia lelei auā le agai i luma o a latou auaunga i le atunuu.
