O le tasi o le aoauli o le Aso Lua o le vaiaso nei, e taunuu ai i Samoa le tino maliu o le afioga i le Akiepikopō le afioga Alapati Lui Mataeliga, o le taitai o le Puleaga Aoao a Samoa Apia o le Ekalesia Katoliko.

Ua faailoa le aso e taunuu ai mai Niu Sila i se faasalalauga faalauaitele mai le pulega o le ekalesia lea ua faailoa ai foi ma tapenaga uma mo sauniga lotu seia oo i ona sauniga faaiu i le tuugamau.

O le tamā pule o le matagaluega a Lefaga le afioga Patele Lafaele Tevaga, o le a taitaia se sauniga lotu pe a taunuu le Sa o le Akiepikopō i le malaevaalele faavaomalo i Faleolo, ona momoli ane lea o lona Sa i le malumalu Katoliko i Leauvaa mo lona misasa amata faalepuleaga i le 4 i le afiafi o le a taitaia e le Sui Epikopō o le Vikaliatu a Leauvaa, le afioga Patele Ponifasio Ulugia.

O le Aso Lulu o le sauniga o le misasā i le Malumalu o Maria Imakulata i Mulivai Apia, Aso Tofi o le isi sauniga o le misasā i le malumalu lava i Mulivai Apia, Aso Faraile o le sauniga faaleaiga ma le Puleaga i le malumalu o Maria Imakulata i Mulivai Apia ma taoto ai lona Sa.

O le Aso Toonai o le sauniga i le Malumalu i Mulivai Apia o le a faia ai molimau faapitoa e pei o le molimau faalemalo o le a saunia e le taitai o le Malo le afioga i le tamaitai Palemia, molimau a le taitaifono o le Fono a Ekalesia Soofaatasi, molimau a lē sa avea ma Ao o le Malo le afioga Tui Atua Tupua Tamasese Efi, ma le molimau a le Taitai o le Puleaga faa-Akiepikopō a Samoa Apia, le afioga Patele Pio Galumalemana.

O le Aso Toonai foi o le sauniga o le misasā mulimuli o le a faia i le malumalu o Iesu le agalofa mamana i Malololelei ma sosoo ai ma le sauniga i le tuugamau. 

Ia faamaise le agaga faamafanafana o le Atua i aiga ma uo aemaise o le Ekalesia Katoliko i le Puleaga a Samoa Apia.