Ua faailoa e le ofisa o le komisi o faigapalota le aofaiga e valu o falepalota i totonu o le itumalo faapalota o Gagaifomauga Numera 2 mo lana filifiliga e ala i le palota laititi i le aso 3 o Iuni. Ua faailoa foi e le ofisa ma falepalota faasavali i Savaii ma Upolu e le gata e faaaogā i le palota muamua le pre polling i le aso muamua o Iuni ae faapea foi i le aso o le palota laititi.
E 3 falepalota faasavali i Upolu o le falemai tele i Motootua, ma le nofoaga o tagata matutua i Mapuifagalele, ae o Savaii o le falemai i Tuasivi ma le nofoaga o tagata matutua i Logoipulotu. E lua falepalota mo le faia o palota muamua i Savaii o le nofoaga o loo iai le ekalesia AOG poo le Faapotopotoga a le Atua i le afioaga o Lefagaoalii ma le nofoaga o loo iai le Ekalesia Faapotopotoga Kerisiano Samoa i Faletagaloa.
O le valu o falepalota i Gagaifomauga N umera 2 e tasi i Paia, 2 i Samauga, 2 i Lefagaoalii, taitasi i Matavai ma Faletagaloa, ma le isi tasi o le falepalota i le afioaga o Fatuvalu. O le Aso Faraile nei e tapunia ai le avanoa e toe faaui ai i tua suafa o ni sui tauva mai le to’alima na faaulu i le Aso Faraile na te’a nei.
Ua faailoa e le vaega faaupufai e puipuia aiātatau a tagata le faaui i tua o le isi o latou sui mai sui e to’alua na faaulu o le susuga Sooalo Umi Feo Mene. O le a faato’ā mautinoa ma faamaonia ni suafa o sui faatutū o le a toe faasolomuli i tua lo latou fia tauva pe a tapunia lea avanoa i le faaiuga o lenei vaiaso.
