O le tauaofiaga a le Palemene i le masina fou o Aokuso lea o le a usuia i le aso 20, o le a faataatia ai e le Malo i luma o le Fono Aoao Faitulafono teuteuga o le Tulafono o Fanua ma Suafa 2020, e pei ona sa afea e saunoaga faalauaitele a nisi o faipule i le fonotaga ua mae’a, poo fea ua fai iai isi aiaiga o le tulafono sa pasia ia Tesema o le tausaga e 2020, ae amata faamamalu i le masina o Mati i le tausaga na sosoo ai 2021.

O le saunoaga a le suifaipule o Falelatai ma Samatau na ia tuua’ia ai le faigamalo a le Faatuatua i le Atua Samoa ua Tasi i le lē usitaia o le faaiuga a le Palemene na pasia ai lea tulafono. 

O se vaega o le saunoaga a le ta’ita’i o le Malo le afioga i le Palemia, Fiame Dr Naomi Mataafa na taualuga iai taualumaga a le Palemene e pei ona sa soalaupule ai le tala faatatau autu o le Tupe mo le tausaga faaletupe e amata i le masina fou lenei o Iulai, ae mae’a i le faaiuga o le masina o Iuni o le tausaga fou 2025.