Ua faailoa se finagalo o le ta’ita’i o le malo le tamaitai Palemia le afioga Fiame Naomi Mata’afa i le matāupu o le faia loa o se palota tele, e pei ona faailoa i se finagalo talu ai nei o le ta’ita’i o le vaega faaupufai o le Faatuatua i le Atua Samoa ua Tasi le susuga Laauli Leuatea Polataivao Fosi Schmidt.

I se lipoti a le leitio a Niu Sila o loo faailoa ai e le Palemia, e faato’ā iloa le tali o le matāupu i le faia loa o se palota pe a tauaofia le Palemene i le masina nei, e pei ona faatulaga o le aso 27 o Me e usuia ai le fono aoao faitulafono. 

E lē o faate’ia se finagalo o le ta’ita’i o le malo, ae o lona finagalo i lea ualesi faasalalau o loo ia faailoa ai, e lē o iai i ni tulaga lē mautonu le pulega o le malo ona o loo sologa lelei mea uma.

O le fono talu ai nei a tusitala ma Laauli sa faailoa ai e le ta’ita’i o lea pati faaupufai, ua tatau loa ona toe foi le atunuu e sa’ili ni sui usufono o le Palemene e ala i se palota tele.

Ua molimauina ai le suia o le finagalo o Laauli mai sona finagalo sa faailoa muamua, lea na ia ta’ua ai e lē tatau ona faia vave se palota faafuase’i, se snap eletion e pei naunau iai le ta’ita’i o le Itu Agai, ona e tele tupe a le atunuu e alu ai.

O le finagalo o Laauli i lea taimi e taatia lea fuafuaga se’i mae’a lelei le paeaiga ona faato’ā faatino lea o se palota tele i le tausaga fou 2026 e mae’a ai le lima tausaga o le paeaiga lona 17 o iai nei a le Palemene.

E pei ona silafia e lua palota o le lē faatuatuaina o le Palemia ma lana Kapeneta, peita’i e le’i mafai e ia taumafaiga ona maua se numela o faipule e lagolagoina le aveesea o le Fono Faatonu e faasino i le Palemia ma Minisita o le Kapeneta.