Ua tau faai’ui’u lenei masina o Novema ae fotua’i mai le masina faai’u o lenei tausaga o le a feagai ai le to’atele o tagata faigaluega i le malo ma pisinisi tuma’oti, ma mālōlōga o le Kerisimasi ma le Tausaga Fou 2025.

Ua mautū aso mālōlō o le Kerisimasi ma le Tausaga Fou i Samoa e pei o le Aso Lulu 25 ma le Aso Tofi 26 o Tesema, faapea le Aso Lulu le aso muamua o Ianuari 2025 ma le Aso Tofi le aso 2 o Ianuari o le Tausaga Fou.

Ae mo tagata faigaluega a le Malo ua iai ma aso mālōlō o le komisi poo commission holidays e faaopoopo i aso mālōlō masani o le Kerisimasi ma le Tausaga Fou.

O aso mālōlō o le komisi mo le aufaigaluega a le malo i Samoa o le Aso Faraile 27 o Tesema ma le Aso Gafua 30 ma le Aso Lua 31 o Tesema.

O le isi aso mālōlō o le komisi e mo na o tagata faigaluega lava a le malo o le Aso Faraile 3 o Ianuari 2025, a o lumana’i ai le toe a’e uma o tagata faigaluega a le malo i le Aso Gafua le aso 6 o Ianuari.

E iva auaunaga a le malo e patino i matagaluega o le a faaauau nisi o a latou tautua e mana’omia pea i taimi o aso mālōlō, e pei o le soifua mālōlōina, leoleo ma le vaega o le fuimu ma galuega lavea’i, ofisa o le tau, le ofisa o galuega lavea’i i taimi o faalavelave faalenatura, faapea auala o faasalalauga i le leitio ma le televise o loo pulea e le malo.