“O Le Taeao Fou: Dawn of a New Day,” o le autū poo le faaulutalaina lea o se Tusi o Fuafuaga ma Ta’iala ua aloa’ia nei le faaaogāina e le Matagaluega o Leoleo i Niu Sila nei.  

O se tusi o fuafuaga o loo ave iai le faamamafa i tagatanuu eseese o le Pasefika, faapea le lalolagi o loo fai Aotearoa ma o latou nuu moni, o se fuafuaga e fai lea ma ta’iala i alii ma tamaitai malu o le malo i le feagai ai ma le faatinoina o la latou galuega faaleoleo, ae o se metotia e faatonutonu folau ai fesaga’iga ma tagatānuu eseese nei; ma ia mautinoa o loo mafai ona tali atu e tusa ai ma moomiaga o tagata Pasefika ma isi mai le lalolagi o loo aumau i Niu Sila.  

O le Taeao Fou, ua faaupuina ai lea fuafuaga o se amataga fou e saga faamausalī ai le sootaga va lelei a le Matagaluega o Leoleo ma tagata ua fai Niu Sila ma o latou atunuu, ina ia mautinoa le malupuipuia o tagatānuu e ala i le tali atu i tu ma aga e tatau ai, ma le tonu.  

E to’atele sui ma ta’ita’i o tagatānuu e aofia ai Initia, Samoa, o le atu Asia ma isi faapea sui o faalapotopotoga na molimauina lea faalauiloa tāua.

Na auai foi sui o le Matagaluega o nisi ua fai ma sui o tagatānuu eseese poo liason officers ma sooupu o loo nafa ma le galuega o le tali atu i tagata lautele e faaaogāina ai le gagana a le atunuu o loo moomia i lena taimi.  

O le Sui Ofisa Sili o le vaega o le Iwi & Communities i le Matagaluega o Leoleo, Pieri Munro na talatalaina le talafaasolopito o lenei Tusi o Fuafuaga i lona amata mai.

Ma i le talatalaga na faailo ai o le fuafuaga sa faavae mai i le tausaga 2005, ma sa faapena ona faafou mai i le tele o tausaga ma i lenei tausaga ua fai lea faalauiloa e faamaufaailogaina ai galuega sa faatino talu mai le amataga seia oo mai i lenei vaitau, aemaise o le tepa taula’i i le lumana’i.  

O le alii Komesina o Leoleo o Niu Sila, Andrew Coster na saunoa autū o le faatasiga ma sa ia faafetaia ai ta’ita’i o itutino o tagatānuu eseese na auai i le faalauiloa, aemaise o le galuega faatino i le fesoasoani i le Matagaluega ina ia tino mai le faamoemoe.  

Na faailo e le Komesina o le ave ai o lana faamamafa i le tāua ai o le faatino lelei ai o galuega faaleoleo, maua’a sootaga ma tagatanuu, ae faapea le galulue faatasi ma le fe’oe’oea’i, ina ia lelei ma atoatoa le faatinoga o le auaunaga e tuuina atu.  

O le toe faafou ai o lenei fuafuaga, e manatu le Komesina, o se tasi lea o le tepa taula’i a le matagaluega ina ia mautinoa le faia ma le tonu, ma le lē faailogatagata o le auaunaga a o le aiā tutusa o le galuega e faatino mo soo se tasi lava.  

Na faailo ai foi e Andrew Coster le moomia ai pea o tagata e galulue faaleoleo, faapea i latou o tagatānuu o le Pasefika, atu Asia ma le toatele e fesoasoani i le galuega.  

Ina ua fesiligia le alii Komesina i ni faafitauli ma lu’itau sa feagai faapea mo tagatānuu e tusa ai ma lenei fuafuaga sa mafai ona ia faasao faapea sui o tagatānuu e tusa ai ma lea itu, e pei ona ta’ua le tele o le suiga ua iai nei, ma na mafai ona maua le atoaga o galuega i le fesoasoani o itutino uma sa mafai ona faatalanoaina tagatānuu e pei ona iai le to’atele i totonu o puleganuu, fonotaga eseese ina ia maua le aano moni o itu e mafai ai ona faatino galuega faaleoleo e aunoa ma le faatupula’ia o ni feeseesea’iga.  

Ta’ua foi se tasi o sui o leoleo Samoa – Detective Inspector, Tofilau Faamanuia (Faa) Vaaelua, le tāua o lea faamoemoe ma lo latou galulue ai aga’i mo se atunuu saogalemu aemaise o le taunuuga ua iai nei le fuafuaga.

O lea ua mafai ona tauaaoina e tagata lautele lenei tusi o fuafuaga “O Le Taeao Fou” i luga o upega tafailagi a le Matagaluega o Leoleo.