O le vaiaso nei ua faagasolo ai le fuafuaga a le komiti mo le faamatagofieina o nuu ma itumalo, o le asiasia lea o tapenaga a nuu ma itumalo ta’itasi, ma iloa ai poo ai o le a maua le sili aoao ma isi tulaga. E 3 vaega o loo vaevae iai le tauvaga lenei, e pei o afioaga i nuu i tua i Upolu ma Savaii faapea motu o Manono ma Apolima-tai, o afioaga i le talafatai o le taulaga i Apia, ma itumalo faapalota e 51.

O loo togi le tauvaga i le matagofie o togalaau i tafāala, felanulanua’i ma le lelei ona faatulagaina o teuga eseese, vaaiga faapitoa pe tulaga ese poo le special features, ia mamā le lapisi, vao ma fata lapisi, ma ia leai ni suaga a meaituaolo ma solofanua i tafāala.

O se tasi o vaega faapitoa o le tauvaga o loo togi iai o auala galue ma ālavai, vaaiga lelei o lapisi ma le aoina, ia mamā lelei ona teu ia leai ni lapisi, ma ia iai ni fata lapisi lelei mo le aoina o otaota ma lapisi. O le sini autu o le tauvaga ia faamatagofie nuu ma itumalo ona ua toe tatala femalagaa’iga masani faavaomalo, ua toe malaga mai ai le atunuu ma tagata tafafao mai fafo. O le a lauina togi o le tauvaga lenei i le vaiaso o faafiafiaga o le Tuto’atasi i le masina fou o Setema.

O le Pulega o Tagata Tafafao mai Fafo, le Matagaluega o una’oa Faalenatura ma Siosiomaga, Matagaluega o Tina ma Tamaitai Atina’e o Afioaga ma Aga Fesoota’i, le pulega o feoa’iga i luga o le laueleele, asosi o faletalimalo ma le faalapotopotoga o le atina’e o tagata tafafao i le motu o Savaii, o loo galulue faatasi i le faamaopoopoina o le tauvaga o le faamatagofieina o nuu ma itumalo faapalota o le atunuu.